Сумар дня на 12. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 12. серпня/авґуста 2022 р.

В Креници ведут проґеотермальны верчыня

В червци/юнію минулого рока, з причыны высокых коштів і великого ризика браку успіху стримана была думка робити ґеотермальны досліджыня під Креницком Яворином, де быти може, подля ґеолоґів, находят ся джерела горячой воды. Рік перше Крениця была обнята пілотажовым проґрамом Міністерства Климату і Державного Фонду Охороны Середовиска і Водной Господаркы пн. «Місто з Климатом». Його цілю єст глядати еколоґічны розвязаня, котры ограничат емісию шкідливых для здоровля і середовиска ґазів. В минулым році, кєд стримана была думка верчыня під Яворином, Міністерство запропонувало будову находячых ся під земльом помп тепла. Як повіл товды бургомайстер Крениці Пьотр Рыба, розвязаня не было згідне з пляном заґаздуваня міста, і могло бы нарушыти джерела мінеральной воды. Тепер єднак курорт разом з містом Рабка берут участ в урядовым пілотажовым проґрамі, і в курортах проведены будут ґеотермальны верчыня. Як пояснил для радия РДН 27. липця/юлия бургомайстер Крениці, будут то низкотемпературовы верчыня на глубокіст 100-150 м. Отримуване в тот спосіб тепло мало бы быти хоснуване до огріваня єднородинных домів. В пілотажу схоснувана буде ділянка в долині Чорного Потока. За бургомайстром, не мож верчыньом нарушыти покладу мінеральной воды, зато терен єст провіряный при схоснуваню мап 3D. Кошт пілотажового проґраму для Крениці і Рабкы то 6 млн злотых. Буде він реализуваный в роках 2022-2027.

Поклады мінеральной воды в Тяжковицях

Іщы в лютым/фебруарі інформували сме про пляны верчыня в Тяжковицях, жебы найти лікуючу воду в околицях Здройового Парку. Ґміна позыскала урядовы грошы на сфінансуваня ініциятивы. Як подал самоурядовый інформацийный сервіс з Тяжковиц, вертіти зачали 18. липця/юлия. Глубокіст верчыня може досягнути аж і кілометра, але єст можливіст, же першы знакы присутности лікуючой воды являт ся уж на глубокости 600-800 м. За інформацийным сервісом, вода з верчыня могля бы выплынути уж о нецілый місяц. Глядаючо-розпознавче верчыня лічничой воды было назване «Ігнатий», од Ігнатия Яна Падеревского, якій уж 100 років тому хотіл гын вознести санаториі, а Тяжковиці зробити великым курортом. По зробліню верчыня ґміна є уж готова до рыхтуваня інфраструктуры, котра доведе лікуючу воду до істнуючого Здройового Парку. Завдякы тому курортникы будут мочы лікувати ся сірковом водом і солянком. Верчыня буде важным кроком до утворіня в Тяжковицях чергового в Малопольщы курорту.

Новый цикль фільмів про Нацийональны Паркы в Польщы

В інтернетовым сервісі YouTube явил ся новый цикль фільмів про находячы ся в Польщы нацийональны паркы. Серия фільмів «Пережый тото! Польскы Нацийональны Паркы» возникла в рамках проєкту «Промоция Нацийональных Парків як бренду», зреализуваного Міністерством Климату і Середовиска. На ютюбовым каналі міністерства мож обзерати 24 фільмы про каждый з 23 нацийональных парків в Польщы і єден спільный. Каждый з образів чыслит близко 10-15 минут, сут медже нима і фільмы про гірскы нацийональны паркы: маґурскій, бєщадскій і татряньскій.

«Звукы і смакы волошского світа» уж заран в Яслисках

Уж заран, 13. серпня/авґуста, в Реґіональным Музею «Кужня Традициі» в Яслисках пройде стріча пн. «Звукы і смакы волошского світа», на яку просит Стоваришыня «В Краіні Джерел». Подія зачне ся о 12.00 год. од бесіды Роберта Банькоша о Шляку Волошской Культуры. Стріча пройде головні в формі музичных і кулінарных варштатів, што будут ведены од год. 13.30, і закінчыт ся карпатском ватром.