Сумар дня на 10. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 10. серпня/авґуста 2022 р.

На Украіні запрезентували русиньску книжку

6. серпня/авґуста в просторах Виноградівской Центральной Публичной Бібліотекы одбыла ся презентация нового русиньского выданя. Іде о книжку народных приповідок, позбераных і упорядкуваных жытельком села Онок – Марийом Білак. Книжка з позбераным народным богатством достала наголовок «Вшиткі люди – вшитко знавуть». Авторка на презентациі новой публикациі розповіла, як роками глядала малы формы народной мудрости, котрых разом назберало ся понад 1200. Редактором выданя єст Михаіл Чухран, голова Виноградівского Районного Общества імени Александра Духновича, котре підпорило выданя книжкы, так само як Юрий Продан, голова Закарпатского Областного Научно-Культуролоґічного Общества імени Александра Духновича. Выдати публикацию поміг і Василь Гера.

В Стропкові познавали лемківску культуру

Ґміна Санкова вєдно з партнерами реализує трансграничный проєкт «Санкова, Стропків, Бобова, Нижня Полянка – Зліпшыня трансграничной спілпрацы в обшыри культурово-природничой спадковины». В рамках реченого проєкту 5. серпня/авґуста в Стропкові на Словациі прошол першый Фестіваль Культуры Погранича, котрого головном цілю была презентация культуровой ріжнорідности та затисняня спілпрацы медже самоурядами. Ґміну Санкова репрезентувала війт Малґожата Малух, на сцені – ансамбль Ручай, а серед ремісників была Анна Добровольска з Кривой зо своіма кривульками та родина Бодаків з Ропиці Руской, што презентувала сницарку. На сцені презентувала ся тіж перша дама русиньской пісні Мария Мачошкова, фольклорный ансамбль Стропковчан, а тіж модерны словацкы артисты, як напр. ґрупа Heľenine oči, Katka Knechtová ци Peter Bič Project.

Поломництво до Ґорлиц

Братство Православной Молодежы Перемышльско-Ґорлицкой Єпархіі просит на пяте піше поломництво зо Ждыні до Ґорлиц орґанізуване з нагоды праздника покровителя єпархіі – священномученика Максима Ґорлицкого, котре припадат на 6. вересня/септембра. Поломництво зачне ся о 5.00 год. літургійом в церкви Покровы Богородиці в Ждыни, де св. Максим был хрещеный. Пак вандруючы через Ґладышів, Маластівску Маґуру, Новицю, Білянку, Ропицю, поломникы дойдут до Ґорлиц. Вшыткы охочы прошены сут о контакт до 3. вересня/септембра до Наталиі Урды, Фомы Болеха або о. Юлияна Феленчака. Складка выносит 20 зл, што покрыват секурацию і іджыня.

Дошна, Горбачевска, Мірґа, Брода

В пятницю, 19. серпня/авґустa, в новицкій Сарепті пройде літній концерт «Єден єст ритм». Юлия Дошна, Уляна Горбачевска, Тереса Мірґа, Вітек Брода і дальшы музиканты з нурту традицийной і сучасной музикы запрезентуют публиці нову музичну якіст базуючу на музиці джерел. Цілю концерту є выкреувати простір, в котрым ріжны нурты: лемківска, украіньска, ромска музика, та музика польскых низин (оберкы, полькы) і сучасна мизука стрітят ся під єдном стріхом, підоймут творчый діалоґ. Початок концерту то 20.00 год. Орґанізатором концерту є Фундация Приятелів Варшавской Осени во спілпрацы м.ін. зо Стоваришыньом Братства Грекокатолицкой Молодежы «Сарепта».