«Слово» – 7-ма неділя по Сошествії Святого Духа – неділя, 9.00 год.

Потреба жывой віры а довіры Ісусови Хрістови. Так можеме характерізовати слово днешнього Євангелія.

Євангелиста Матфей нам говорить о выздравліню двох сліпых, котры кричать на Ісуса: Ісусе, Сыне Давіда, розмилуй ся над нами. Ісус входить до дому, но сліпці ідуть за ним. Або скорше давають ся ввести тыма, што їх провадять.

Ісус ся їх звідує на єден важный вопрос: Ці вірите, же я можу тото зробити? Ісус наперед кладе опрос о вірі? Они одповідають: Віриме! Ісус їм не повів, так най ся отворять вашы очі, або будьте здравы з вашой хвороты. Но говорить їм, най буде так, як вірите. А їм ся отворили очі.

Ісус тот вопрос кладе не лем про тых сліпых, але кладе го на підкріпліня нашой віры. Тыма словами Ісус і нам адресує: Віриш, же я можу тото зробити? Кедь ідеш ку тайні покаяня, Ісус ся і мене звідує: Ці віриш, же я можу змінити твій жывот, дати тобі новый напрям?

Тогды, як діавол ті нашептавать: Даремно ся намагаш ослободити од алкоголу, наркотіків, невязаности, тілесноти ці привязаности. Того ся не збавиш. А ту звучать слова Хріста: Віриш, же я тото можу зробити?

Коли іду ку Святому Причастю, вірю, же Господь є ту а подає мі самого себе, своє Тіло і свою Пречісту Кров? Коли чітам Святе Писмо, вірю, же є то Боже слово, котре Господь говорить і ку мі днесь?

Сліпы, котры послухали тоты слова і одповіли, віриме, такой ся їм отворили очі. Наслідуйме і мы їх приклад і говорме Господу і мы тоты слова, але не поверьхово, але од сердця. Жебы сьме могли чути одповідь: Най буде подля вашой віры. Слава Ісусу Хрісту!

В неділю, 31. юла 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. юла о 12.00 год. і 1. авґуста о 2.00 год. за русиньскым часом.