Сумар дня на 22. липця/юлия 2022 р.

Приносиме вам сумар медияльной ґрупы ЛЕМ.фм+ на ден 22. липця/юлия 2022 р.

Януш Ковальскій заповіл, же буде внескувал забрати німецкій меншыні вшыткы грошы на вчыня іх рідного языка

Згідно з розпоряджыньом Міністра Едукациі з лютого/фебруара того рока німецкій меншыні в Польщы ограничено з 3 до 1 чысло лекцийных годин, презначеных на додаткове вчыня німецкого як рідного. Введене тото буде од нового шкільного рока. Розпоряджыня выкликало шор протестів не лем німецкой меншыны, але і інчых прожываючых в Польшы, а тіж і академіцкого середовиска. 19. липця/юлия на засіданю соймовой Комісиі Нацийональных і Етнічных Меншын дискутували м.ін. тему одповіди Міністра Едукациі і Наукы на дезидерат в справі дискримінациі діти, што належат до німецкой меншыны. Ресорт підтримал своє становиско, выразил лем готовіст вести дальшы бесіды при участи представників німецкого уряду. Януш Ковальскій, посланец Солідарной Польщы, заповіл на стрічы, же буде внескувал в часі тырваня прац над буджетом державы в будучым році одобрати вшыткы грошы для німецкой меншыны.

Выстава в Сандецкым Етноґрафічным Парку

«Етнічны меншыны і етноґрафічны ґрупы в Малопольщы – Лемкы, Німці, Циґане і Жыды» то пляншова обіздова выстава присвячена темі етнічных і етноґрафічных ґруп з обшыри Малопольщы. Представлят она історичный рис і коротку характеристику поєдных меншын, в тым актуальну обшыр іх прожываня, центра культурной діяльности і найважнійшы орґанізациі. Ціліст збогачена єст чысленныма фотоґрафіями, што документуют фунґуваня ґруп і діяня, якы підтримуют іх унікатовы традициі. Выставу мож видіти до 11. вересня/септембра в Сандецкым Етноґрафічным Парку. Експозиция зрыхтувана єст Округовым Музейом в Тарнові в рамках культурового проґраму «SKANSENOVA – системова опіка над спадковином в малопольскых музеях і музеях під одкрытым небом».

В Чорноріках новы інвестициі

Близко 3,4 млн зл выдаст ґміна Корчына на новы спортово-рекреацийны інвестициі в Чорноріках на Коросняньскій Руси. Трасу для лыж і товаришучый ій рекреацийно-спортовый будинок вознесут і для професийоналистів, і для аматорів ізды на лыжах. Догваріня на реализацию задачу уж підписали і іщы того рока скейтеры і біговы лыжникы будут мочы схоснувати новы одтинкы трасы. Окружыня, котре має долгіст 400 м, по розбудуваню выдолжыт ся до 1250 м. При трасі вознесут двоповерховый будинок о просторі 190 кв м, в якым будут бюра і ізбы до переобліканя ся. Істнуюча дотепер лыжна траса притігала зимом вельох аматорів біганя на лыжах, головні в вікенды. Коли не было снігу, іздили по ній на рольках. Війт ґміны Корчына Ян Зых заповіл, же буде ся старал о освітліня трасы, жебы была доступна вельо годин. Він надіє ся, же будут на ній тренувати тіж професийоналисты, а в будучым може буде то тіж місце змагань.

Кулінарны стрічы з лемківскыма стравами

Ґмінный Осередок Культуры в Команчы в рамках реализациі проєкту «XXV Приграничны Стрічы Польщы і Словациі – благодійный концерт для Украіны» просит діти, молодіж і дорослых взяти участ в кулінарных стрічах. Днес і заран рыхтуваны будут стравы традицийной і лемківской кухні. Деталі про місце і годину стрічы доступны безпосередньо в орґанізаторів подіі. Проєкт дофінансуваный єст з середків Міністра Культуры і Нацийональной Спадковины в рамках проґраму Нацийонального Центра Культуры: Культура – Інтервенциі. Едиция 2022.

джерело фот.: www.sejm.gov.pl