«Слово» – 4-та неділя по Сошествії Святого Духа – неділя, 9.00 год.

Выздравліня стотникового прислужника. Стотник приступує ку Ісусови з просьбов: мій прислужник лежыть дома невладный і тяжко терпить. А Ісус одповів: Прийду і выздравлю го.

Ісус Хрістос тоты слова не повів лем так до вітра. Але хотів одкрыти велику віру того стотника. Бо на тоты слова стотник реаґує: Господи, я недостойный, жебы ты вошов під мою стріху, но повідж лем слово , а мій слуга буде здравый. А Іщі сотник додав, бо він є під началством а мать під собов підрядженых йому. А кедь мої слова мають таку силу – повім єдному ідь, іде; другому прийдь, прийде, о кілько веце мать силу твоє слово, Господи. На твоє сово, я вірю, буде выздравленый тот мій прислужник.

Ісус ся зачудовав а над чім? Над великов віров того римского стотника. Ісус повів: Таку велику віру я не нашов у никого в Ізраілю. А додав: прийдуть многы од Выході і Западу а засядуть в Царьстві небеснім а сынове царьства будуть вышмарены вон до тмы. Сынове Царьства суть выбраный народ, котрый не прияв і не увірив Господу.

Але тото слово може односити ся і ку нам, як ку новому Ізраілю. І на нас є велика одповідность. Кому веце дане, веце ся буде выжадовати. Дайме собі вопрос: Яка є моя віра в Боже слово, вірю словам Ісуса, же они суть правда? А кедь повім, же вірю, старам ся їх перенести до жывота?

Най і тото слово повзбудить нас і напомяне, як і утвердить у вірі, довірі і послухняности Божому слову. Жебы сьме раз не мусили выслухати слова: сынове Царьства будуть шмарены вон до тмы… Але жебы сьме і мы засіли єдно з Авраамом і Ісааком і Яковом в Божім Царьстві. Амінь. Слава Ісусу Хрісту!

В неділю, 10. юла 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. юла о 12.00 год. і 11. юла о 2.00 год. за русиньскым часом.