Новый курорт на Лемковині – Злоцкє

Дотепер на обшыри ґміны Мушына фунґували два курорты: Мушына-Злоцкє та Жеґєстів. Од 21. червця/юнія єст іх уж три. То евенемент на скалю Европы.

Перед парома місяцями до Міністерства Здоровля зложыли внесок надати статус курорту для Мушыны і окремо для Злоцкого. Уж 21. червця/юнія в Деннику Устав опубликували розпоряджыня Рады Міністрів в тій справі. Як підкрислят бургомайстер Мушыны – «была то уж лем формальніст».

Злоцкє новым курортом

Курорты на Лемковині знаны сут особливі завдякы властивостям мінеральной воды, што находит ся на іх обшыри. Недавно чысло курортів звекшыло ся о додаткове такє місце. Шолтыствам: Злоцкє, Щавник і Астрябик на обшыри ґміны Мушына надали статус «Курорт Злоцкє». З дотеперішніх двох курортів: Мушына-Злоцкє та Жеґєстів од 21. червця/юнія сут три: Мушына, Жеґєстів і Злоцкє.

«Тепер уж лем треба упорядкувати і орґанізацийні выокремити три курорты на обшыри Мушыны. Цікавинком є, што будеме єдином ґміном в Европі, котра має аж три курорты на своім терені» – бесідувал Ян Ґольба, бургомайстер Мушыны.

Переписы в справі утворіня нового курорту входят в жытя в тых днях, значыт 14 днів по оголошыню.

В найблизшым часі так само рушыт ремонт знаной санаториі Метальовец в Злоцкым. Обєкт має достати нове жытя і навязувати до модерністичного стилю 60. років ХХ ст. Інвестиция певністю буде влияла на атракцийніст нового курорту.

Што ся змінит?

Статус курорту мож надати обшырям, де находят ся натуральны лікуючы ресурсы о потвердженых властивостях. Повинны быти гын заклады лікуваня та одповіднє ґратя підпераюче процес лікуваня. Сут тіж вымогы тыкаючы комунальной господаркы, публичного транспорту, енерґіі і інчы. Додатково на іх обшыри поберат ся курортну оплату.

А коли Телич?

В Теличы жыє менше як два тисячы осіб. Село находит ся пару кілометрів од Крениці, на зламі Сандецкого і Низкого Бескідів. Давнійше Телич мал містны права. Знаный є з джерел мінеральной воды, мофет, а тіж одповідніх обставин до ізды на лыжах.

Недавно в селі вознесли солянкову інгаляторию, звекшаючы туристичну атракцийніст. В плянах мают одновити памятникову студню і зробити пляжу при потоці Мухначка.

Минулого рока явила ся думка пошырити креницку курортну зону о Телич. Теличане згодили ся, жебы іх шолтыство обняти курортном стрефом. Власти Крениці выслали одповідній внесок до Міністерства Здоровля, жебы одновити курортный операт, на што достали уж позитивну одповід. До двох тыжнів закінчыт ся властива процедура, што дозволит признати статус курорту Теличови.

«Документы сут уж в міністерстві. Тепер ждеме лем на анекс. Коли скінчыт ся процедура, будеме мочы оголосити, што Телич находит ся в курортній стрефі» – реляцийонувал бургомайстер Крениці Пьотр Рыба.

Телич не буде окремым курортом, а лем войде до єдной з курортных зон, што обнимают Креницю.

Фот. muszyna.pl