До найменше розвитых окресів Земпліна і вышнього Шаріша мають іти десяткы міліонів евр

До найменше розвитых окресів на Земпліні і у вышнім Шарішу будуть в слідуючіх роках прямовати десяткы міліонів евр.

До минулорічной вызвы, котра была про найменше розвиты окресы, зо заміряньом на будованя і реконштрукцію містных комунікацій, могли приголосити ся села з чіслом жытелів до 500 без потребы сполуфінанцованя. Міністерство інвестіцій, реґіоналного розвитку і інформатізації Словацькой републікы (МІРРІ) о тім аґентуру TASR інформовало в реакції на пожадавкы старостів і пріматорів Земпліна і вышнього Шаріша.

„Актуално можуть самосправы змагати ся о фінанчны средства з реґіоналной дотації. Тота є давана з розрахунковой капітолы МІРРІ в згоді з планом ровитку,“ інформовав резорт. Про окресы Меджілабірці, Бардейов, Снина, Стропків і Михалівці є на тот і слідуючій рік алокованых понад 2,5 міліона евр.

Вызва про окрес Михалівці з діспонібілныма средствами майже 1,3 міліона евр, выголошена 21-го юна 2022-го року, є заміряна на містный економічный розвиток і робітность, причім уможнює выникнутя соціалных і сельскых подників ці розвиток промыслу, служеб і земледільства.

В рамках розвитку турістічного руху є мож наприклад будовати ціклотрасы або розшырити понуку реґіоналных выробків. Підпореныма областями є і обнова сел а якость жывотного оточіня, як і розвиток людьскых джерел.

Новы планы розвитку на період років 2022 аж 2026 мають дотуляти ся довєдна 19-ох найменше розвитых окресів на Словакії. До реґіону Шаріша і Земпліна має на тот ціль іти довєдна 31,6 міліона евр. Найвеце, майже пять міліонів, до окресу Михалівці, найменше, нецілых 1,9 міліона евр, до Меджілабірьского окресу.

В тім році бы мали быти іщі выголошены вызвы про окресы Сабінів, Свідник, Воронів над Топльов, Собранці і Требішов.

Старостове і пріматоры з вісем окресів выходу Словакії представили в пятніцю 24-го юна 2022-го року вісем пожадавок на змірніня наслідків скорого і великого роснутя цін енерґій і інфлації на самосправы. Дакотры были повязаны і з намагами о змірніня реґіоналных розділів.

До кінця октобра 2022-го року жадають представити конкретны крокы ку вырівнаню реґіоналных розділів на Земпліні.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА