«Слово» – 2-га неділя по Сошествії Святого Духа – неділя, 9.00 год.

Ісус Хрістос приходить із Юдеї до Ґалілеї. Переходачі коло Ґалілейского моря кличе першых учеників. Сімона, званого Петро, і його брата Андрія, а Йоана і Якова. Позывать їх словами: Подьте за мнов, а я вас зроблю рыбарями людей.

Видиме ту їх реакцію. Они такой зохабили сіті а ішли за ним. В тім слові – зохабили сіті, є згорнуте вшытко: зохабили свою родину, близкых, маєткы, свою роботу, котра їм приношала обжыву. Одрікають ся вшыткого, жебы могли мати Хріста. Жебы могли Його наслідовати.

Ісус їх кличе ловити людьскы душы до сіті Божого Царьства. Ловити рыбы значіло про тотты рыбы істу смерть, але Ісус посылать людьскы душы ку жывоту. Так тоды тото слово є адресоване в першім ряді ку апостолом. Тыж тото слово є адресоване ку людьскым сердцям, котрых Господь кличе до духовного ставу: священства і монашества. І ту говорить: Подьте за мнов а я вас зроблю. Вы лем зробте тото, што зробили мої першы апостолы: зохабили вшытко а ішли за ним.

Але тыж тото слово належыть ку вшыткым хрістіанам. І ту говорить слова: подьте за мнов. Ісус нас вшыткых позывать його наслідовати, іті по його дорозі. Бо Він повів Я єм дорога, правда і жывот.

Ісус указує нам своїма словами, своїма ділами, своїма заповідями дорогу ку небесному Царьству. І діавол старать ся нас звести долов із той дорогы на шыроке пространство погыбелі. Старать ся нас звести до гріха, до роскошей, до страстей, до темноты.

А слово Хріста звучіть: подьте за мнов. Коли не будеме слухати голос злого, але будеме послухняны голосу Хріста. А будеме ся старати іти за Ним, тогды і мы будеме приношати світло і указовати дорогу тому світлу – Хріста, а то там де ся находиме ці в родині, ці в роботі, ці в будьякым поставліню.

Тото слово звучіть в трьох напрямах: ку апостолам, ку духовному покликаню і ку вшыткым хрістіанам. Прото послухнийме голос нашого Господа: Подьте за мнов. Наслідуйте мене так, як то зробили першы апостолы: зохабили вшытко і ішли за ним. Слава Ісусу Хрісту!

В неділю, 26. юна 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. юна о 12.00 год. і 27. юна о 2.00 год. за русиньскым часом.