Сумар дня на 21. червця/юнія 2022 р.

Приносиме вам сумар медияльной ґрупы ЛЕМ.фм+ на ден 21. червця/юнія 2022 р.

ІІІ Словацко-Польскій Форум в Бардийові вернул до традицийной формы

Польща і Словация од років ведут спільны проєкты, цілю котрых єст розвиток ци збільшыня туристичной атракцийности і рівня жытя мешканців обох держав. Стріча прошла під гаслом «Спілпраца – ключ до добросусідскых реляций і успішного будучого». В часі подіі запрошены гості бесідували на тему ефектів веденой трансграничной спілпрацы, приграничной транспортовой інфраструктуры ци перспектив на будучый розвиток. В дискусиі голос забрал председа Пряшівского Самосправного Краю Мілян Маєрскій, котрый підкрислил, што спільне хоснуваня европейскых фондів дозвалят будувати мосты і дорогы, котры лучат Словацию з Малопольщом ци Підкарпатьом. То зас дозвалят вести многы спільны проєкты і спільный туристичный розвиток обох держав. Звернул він і увагу на важніст розвитку інфраструктуры для роверовой туристикы. Додал тіж, же Полякы знают скоро і ефективні схоснувати доступны середкы з европейскых фондів, што інспірує і заохочат до спілпрацы.

X i 1/2 Лемквскій Вечер – про лемківскы традициі і культуру

Літній час заповідат ся полный цікавых культурных подій, а єдном з них буде X i 1/2 Лемквскій Вечер – стріча з культуром, музиком і традициями Лемків. Подія орґанізувана єст од 2014 рока Анном Романьчак і Пшемком Поляньскым, членами ансамблю А де то давнійше строіло. Кажда зо стріч єст посвячена інчій темі. Участникы будут мати нагоду спрібувати лемківску кухню і слухати традицийну музику. Того рока заграт Капеля Древутня, знана зо специфічного лучыня традицийного фольку з модерныма звуками і своіма опрацуванями. Лемківскій Вечер тішыт ся штораз більшом популярністю, зато охочы брати участ в подіі скорше мусят резервувати місця. Тогорічна едиция пройде 1. липця/юлия в Реставрациі Паркова. Вступ платный 30 зл. Медияльный патронат над подійом тримат наше радийо ЛЕМ.фм.

Малопольскы Вінкы – разом на собітковій забаві

В неділю, 19. червця/юнія, в Скансені Погіряньского Села в Шымбарку одбыла ся V едиция Малопольскых Вінків. Подія мала характер пленеровый і тыкала традициі собіток. Проґрам стрічы был богатый і каждый міг найти одповідню для себе атракцию. Орґанізаторы заплянували варштаты робліня вінків і артистичного ремесла, были народны гры і забавы та тереновы змаганя в гляданю квітя папортины. Не бракло тіж лемківскых акцентів, бо серед артистичных ґруп нашли ся представникы ансамблю Терочка, котры разом з ведучым вели варштаты гуляня. Пак было спільне пущаня вінків до рікы Ропа і гулянкы при ватрі. Подія тішыт ся великом популярністю не лем серед жытелів ґорлицкого повіту, але і туристів.

Новы культурны подіі в Устю Рускым

Припоминаме, што Театральна ґрупа Племя ведена Моніком Бабульом і Ґмінный Осередок Культуры в Устю Рускым просят 23. червця/юнія на одкрытя нового культурального місця в Устю Рускым – «Сцены під Деревом». Як перша выступит на ній Аґнєшка Пшепіорска Франкєвич зо свойом монодрамом, а пак ґрупа Племя просит на спільну «Собітку». Подія зачне ся о 20.00 год., зато же єст в пленері, то орґанізаторы просят забрати зо собом коцы і каріматы.