Сумар дня на 13. червця/юнія 2022 р.

Приносиме вам сумар медияльной ґрупы ЛЕМ.фм+ на ден 13. червця/юнія 2022 р.

Цілонародны святкуваня Дня Русинів Словациі

Русиньскa Обродa на Словациі і єй партнеры припомнули Ден Русинів Словациі, якій выпадат 12. червця/юнія. Орґанізация зрыхтувала ріжны подіі в містах, де жыют Русины. Головный проґрам одбыл ся вчера в Бардийові, де во спілпрацы з містом Русиньска Оброда приготовила цілонародны святкуваня. Русиньскє свято в Бардийові зачало ся торжественном процесийом в народных кроях до центра міста, де пак одбыл ся культурный проґрам. Выступили русиньскы колективы і солисты, концерт завершыл выступ єдиного русиньского професийонального ансамблю ПУЛьС. Ден перше, 11. червця/юнія, проходили святочны подіі в Снині і Меджелабірцях. В обох містах так само были концерты. Ґу святкуваню приєднало ся тіж Нацийонально-Етнічне Высыланя Радия і Телевізиі Словациі в Кошыцях. Радийо уж 8. червця/юнія зрыхтувало в своіх просторах публичный концерт з назвом Мария Чокінова – голос, на котрый ся не забыват. Днес, уж традицийно вєдно зо святкуваньом Дня Русинів Словациі, одбыват ся і Духновичів Пряшів. 21. річник того цілословацкого конкурсу деклямациі в русиньскым языку одбыват ся в просторах Театру Александа Духновича. З той нагоды квітя буде зложене і при пряшівскым памятнику Будителя.

Нова выстава в Музею Русиньской Культуры в Пряшові

Словацкій Нацийональный Музей – Музей Русиньской Культуры в Пряшові во спілпрацы з Русиньском Обродом на Словациі рыхтує нову выставу. Вернісаж выставы «Русины в збірці образів Петра Микулы» одбуде ся в пятницю, 24. червця/юнія, о 16.00 год. Буде мож єй обзерати до кінцця липця/юлия тр.

Творы Варголя на выставі Нацийонального Музею в Кракові

Медже інчыма працы Енді Варголя мож обзерати на выставі «Сучасна штука з Колекциі Князів Любомирскых» в Павілоні Юзефа Чапліньского – одділіню Нацийонального Музею в Кракові. На експозициі презентуваных єст близко 60 прац понад двадцетьох найвызначнійшых представників світовой аванґарды, клясиків як Далі, Міро ци Пікассо, представників ґрупы CoBrA та артистів звязаных з американьскым поп-артом і европейскым стріт-артом, як Варголь, Індіaна і Бенксі.

В Дукли мож дармо выпожычыти біциґлі

В Дукли одкрыли дармову выпожычальню роверів. Находит ся она при Містным Осередку Спорту і Рекреациі і єст єдном з 16 пристанків на туристичній стежці «По Дукли». Выпожычальню одкрыли в рамках проєкту «Дукля-Свидник 360». До диспозициі єст 10 біциґлів – гірскы і електричны. Роверы мож безплатно выпожычыти на максимално 7 годин.

«Малопольскы Вінкы» в Скансені Погіряньского Села в Шымбарку

Війт ґміны Ґорлиці, Осередок Культуры Ґміны Ґорлиці і Музей Дворы Карвациянів і Ґладышів в Ґорлицях просят на «Малопольскы Вінкы». Подія пройде в неділю, 19. червця/юнія, в Скансені Погіряньского Села в Шымбарку. Акция зачне ся о 15.00 год. варштатами артистичного ремесла і рыхтуваня вінків. Запрезентуют ся ткацкы ґрупы і фолькорны ансамблі. Не бракне лемківской музикы, выступит бо і ансамбль Руской Бурсы в Ґорлицях Терочка. По переході короводу, при огниску одбуде ся обряд літньой ночы і пущаня вінків на ріці Ропа.