«Слово» – Неділя сліпого – неділя, 9.00 год.

Неділя сліпонародженого – послідня неділя Пасхалного часу. Євангеліє нам говорить о події выздравліня чоловіка сліпого од народжіня.

Ісус такой на початку того слова указує, же Він є тым, котрый творить діла Божы а потім потверджує слова ділом. Зробив болото зо слины і глины, помазав ним сліпому очі, послав го омыти ся до Сілоамской купальні. А коли тот чоловік послухав Його голос і зробив, як было му наказане, вернув ся видячім.

Тым Ісус указав, же є тот самый Сотворитель, котрый на початку сотворив чоловіка з глины а вдыхнув йому дых жывота – безсмертну душу, теперь своїма сотворительскыма руками творить очі сліпому.

Но архієреї ани фарізеї не могли знести діл Ісуса. Вывідують ся виздравленого: якым способом отворив йому очі. А тот сміло одповідать, потім кличуть родічів, но они боять ся жебы не были вшымарены зо сінаґоґы, кедь ся признають ку Хрістови. А так знова кличуть выздравленого, а він з великов смілостьов їм одповідать а выявлять їх сліпоту душевну. А сам ся уж ставить меджі учеників Хріста, словами – ці вы хоче быти його ученикы? Они його выгнали зо сінаґоґы. Вылучіли із общества выбраного народа. Но Ісус його нашов а звідує: віриш в Сына Божого? То є тот, котый із тобов бісдує. А тот одповів: вірю а поклонив ся.

Так окрем тілесного провиджіня видиме, же тот чоловік провидів і душевно. Спознав свойого Сотворителя і поклонив ся йому. А фарізеї і архієреї перебывали далше в духовній сліпоті, хоць духовне світло уж світило.

Так днешнє слово указує нам важность провидіти духовныма очами, спознати привдиве світло, котрым є сам Господь а ходити в тім світлі. Не вертати ся до темноты. Хрістос своїм воскресіньом нас позывать прияти Його світло. Але маме слободну волю, котров ся рішаме, кого будеме слухати. Ці Господа, котрый нам укзує світлу дорогу одпущіня, покоя, своїх заповідей, котра веде до вічной блажености в небі! Або діавола, котрый указує нам дорогу темноты, страсти, гріха, привязаности ку земному, роскошам а веде до вічной погыбелі.

Бо одплатов за гріх є смерть, але вічный жывот є в Хрістови. Хрістос воскрес!

В неділю, 29. мая 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. мая о 12.00 год. і 30. мая о 2.00 год. за русиньскым часом.