Сумар дня на 27. мая 2022 р.

Приносиме вам сумар медияльной ґрупы ЛЕМ.фм+ на ден 27. мая 2022 р.

В Свиднику тырват Русиньскій Фестіваль

Іщы до неділі буде тырвала ювілейна 10. едиция Русиньского Фестівалю. На днес на год. 18.30 заплянуваный початок головных концертів во свидницкым амфітеатрі. Серед днес выступуючых сут: дітячый ансамбль Зборівчата, ґрупа Орфеус при участи Марияна Чековского, ци ґрупа Руснак’с з Пряшова. На конец на сцені вкаже ся DJ. Заран, в суботу, подія зачне ся од презентациі документального фільму Паля Пекарчіка пн. «Провідник перетырваня – Русины». Концерт зачне ся од выступу ансамблю Калина, а уж о 19.00 запрезентує ся ПУЛьС з Пряшова. Дальше выступлят польскій фольклорный ансамбль Доліна з села Кремпахы і ґрупа Ілошвай. На конец, о 22.00 год., на сцені вкаже ся Peter Bič Project. В неділю о 14.00 год. подію зачнут домашні ансамблі і гості. Пак одбуде ся лотерия білетів. Наконец о 16.00 год. выступлят ансамбль Basawell і Анна Порачова.

Принята резолюция в справі установліня Державного Проґраму Діянь Для Рівного Трактуваня 2022-2030

Польска Рада Міністрів приняла резолюцию в справі установліня Державного Проґраму Діянь Для Рівного Трактуваня на рокы 2022-2030. Головном цілю політикы рівного трактуваня єст выелімінувати дискримінацию з социяльного жытя в Польщы. Проґрам мал бы протидіяти нарушаню правил рівного трактуваня, особливо зо взгляду на пол, расу, етнічне походжыня, нацийональніст, реліґію, віроісповіданя, світопогляд, неполносправніст, вік або орієнтацию. Має тіж за ціль підносити социяльну свідоміст рівного трактуваня, в тым на тему причын і консеквенций нарушыня того правила. Більше інформаций находит ся на урядовым сайті Міністерства Родины і Социяльной Політикы.

Фурт мож ся зголошувати до участи в Карпатскій Локальній Ініциятиві

Іщы до неділі, 29. мая, мож ся зголошувати до участи в Карпатскій Локальній Ініциятиві пн. «Пастырска Аркадия нашых предків – поворот до джерел». До участи просят Стоваришыня «Ляцкова» з сідибом в Баници, Охотнича Пожарнича Страж в Баници і Ґмінный Осередок Культуры в Устю Рускым. В рамках проєкту будут ведены едукацийны занятя «На пути Волошской Культуры», варштаты «Карпатскє ідло» з традицийных метод вырабляня масла, хліба і осципків, артистичны варштаты з писаня ікон, з лемківской пісні, народного взірництва ай театральны варштаты. Участ в ініциятиві єст безплатна.

Ретро-потяг зас поіхат путями Малопольщы

Мож резервувати білеты на переізды ретро-потягом, якій поіхат трасами Малопольщы в рамках ХІ едициі проґраму Малопольскы Пути Желізничной Туристикы. Ретро-потяг буде курсувал од липця/юлия аж до осени. Зрыхтуваны сут переізды з Нового Санча до Крениці і Біча, з Тарнова до Тухова і Жабна, як і на трасі Новый Санч – Хабівка. Так як в попередніх сезонах, каждый з переіздів буде полученый з додатковыма атракциями. Вчас постоів на стациях буде мож прібувати реґіональну кухню і познавати локальну туристичну оферту.

В Креници побудуют амфітеатр

Місто Крениця отримало будівляне позволіня на будову амфітеатру. Обнимат оно і згоду на розобраня бібліотекы і фраґменту деревяного тору до ізды на санках, якы ся находят в плянуваным місци будовы. Обєкт має стояти в центрі міста, зараз при нижній стациі колейкы на Паркову Гору. Будова амфітеатру має зліквідувати вельо проблемів. Не треба буде примірно будувати тымчасовой сцены на Дептаку ци стадийоні. Кошт будовы амфітеатру то 12 млн злотых. Нова сцена має рахувати 100 квадратовых метрів, а авдитория мала бы помістити тисяч осіб.