Дистрикт Попу ожывит артистичне жытя околиці Музею Енді Варголя

В Пітсбурзі, рідным місті Енді Варголя, плянуют зорґанізувати Дистрикт Попу. Має то быти місце, якого Варголь не мал в молодости і за чым мусіл піти жыти до Ню Йорка.

Як подає Музей Енді Варголя, ініциятива має обнимати шіст блоків і быти частю пошыреной і перепроєктуваной Фабрикы, центра творчой вселенной Варголя. Іде о забезпечыня нового креативного простору для місцевых артистів, молодежы і жытелів.

Місце на новы бізнесы, але головні місце для штукы

Явили ся уж першы елементы дистрикту, а то м.ін. мураль (намалюваный артистом з Маямі на алейці, што прилігат до музею) та різба, котру помістили на траві напроти музею.

«Енді фурт символизує американьского духа бізнесу, представника змін, інфлюенсера» – повіл Патрік Мур, директор Музею Енді Варголя. «Маме тепер плян і можливости, жебы піти в його сліды і принести зміны для Пітсбурґа» – додал.

Цілю проєкту є тіж звекшыти фінансову стабільніст музею, забезпечыти місце для творчых варштатів, але так само влияти на формуваня будучности міста, котре в остатніх роках перешло ґентрифікацию.

Дистркт Попу мал бы ся находити за Мостом Енді Варголя і побудити економічный розвиток о вартости 100 млн дулярів. Власти музею мают надію, што нова обшыр на мапі міста притягне реставрациі, ґалериі штукы ци інчы бізнесы і што стане ся атракцийным місцьом для жытелів і туристів.

Поліпшыня фінансовой ситуациі Музею

Директор Мур подал, што пошыріня простору музею буде обнимало нехоснуваны комерцийны місця, а в сусідстві музею праві неє мешкальных будинків і не влине то на конечніст перепроваджаня ся люди. Додал тіж, што постійна присутніст інституций може быти стабілизуюча для теперішньой ситуациі околиці.

Музей Енді Варголя был основаный в 1994 році і был першым музейом в цілости посвяченым повоєнному артисті. Находит ся в ним найвекша колекция творчости короля поп-арту, обнимаюча образы, рисункы, реклямовы ілюстрациі, ґрафікы, фотоґрафіі і фільмы.

Пандемія коронавіруса і выникаючы з ней ограничыня в ведіню діяльности змусили власти музею передумати формы бізнесового моделю інституциі.

Дистрикт Попу задумали як не лем пошыріня діяльности музею, але і джерело новых доходів. В плянах є побудувати дистрикт протягом 10 років за суму 60 млн дулярів.

Першый етап робіт сфінансуваный буде донациями од Фундациі Річарда Кінґа Мельона (15 млн дулярів) і Фундациі Генри Гільмана (10 млн дулярів). Част з тых грошів передадут на выкупліня поблизкого паркінґу з перезначыньом на простір для выступів, котрый помістит од 800 до 1000 люди. Має быти готовый в 2024 році.

Ґрупа креативных, срібны стіны, місце для нового Варголя

В липци/юнію плянувана є дальша акция пошырювати оферту музею. На семе плянтро опустошеного будинку в сусідстві музею має прити ґрупа молодых творчых осіб. Будут вытворювати гын зміст на Інстаґрам і ТікТок для Музею Енді Варголя, а при тым школити ся в обшыри діґітального знаня.

Простір для діяльности креативной ґрупы діючой під музейом має быти наниманый по преференцийній ціні од властителя нерухомости Джеремі Левенталя, котрый засідат в консультацийній раді музею. Нове місце має навязувати до нюйоркской Фабрикы Варголя.

Постійны варштаты серіґрафікы (улюбленой формы Варголя) будут проходити в будинку склепу, обік музею. Простір буде доступный для музею дармо през рік.

Стіны в тротуарі, де нашол ся новый мураль, помалювали на срібный кольор, як навязаня до срібной фолиі, котром выложены были стіны Фабрикы. Музей думат уж над малюваньом і освітліньом підземных переходів, котры лучат Дистрикт Попу з рештом міста.

Директор Фундациі Річарда Кінґа Мельона ствердил, што найважнійше в проєкті утворіня Дистрикту Поп в Пітсбурзі є, жебы мати певніст, што наступный Енді Варголь не буде мусіл лишыти місто, жебы остати Енді Варгольом.