Сумар дня на 20. мая 2022 р.

Приносиме вам сумар медияльной ґрупы ЛЕМ.фм+ на ден 20. мая 2022 р.

Одкрыте ХІ Медженародне Бієнале Лемківской/Русиньской Культуры

Уж днес початок ХІ Медженародного Бієнале Лемківской/Русиньской Культуры. Головныма орґанізаторами подіі сут Стоваришыня Лемків і Світова Рада Русинів. Подія традицийно зачынят ся од одданя чести Епіфанови Дровнякови – Никыфорови Креницкому, панахідом на його гробі, а пак зложыньом квітя при памятнику маляря. В днешнім проґрамі сут і одкрытя выставы лемківскых/русиньскых творців, концерты русиньскых ансамблів і переданя двох цінных русиньскых нагорід – преміі ім. Василя Турока-Гетеша признаваной для вызначных діячів та нагороды Pro Arte Ruthenorum, яка належна є найліпшым русиньскым творцям культуры. Субота буде посвячена дискусиям і выміні поглядів. В тот ден одбуде ся і засіданя Світовой Рады Русинів. ХІ Бієнале закрыє третій концерт. Вшыткы концерты будут проходити в Старым Здройовым Дому.

Поліхроміі Новосільского трафили до реґістру памятників

Мазовєцкій Воєвідскій Консерватор Памятників вписал до реґістру памятників поліхроміі і малярскы декорациі та ікону Божой Матери Оранта авторства Юрия Новосільского, што находят ся в церкви св. Яна Ліствичника в Варшаві. Сут они выпосажыньом каплиці покровы Ілиі Пророка і Блаженного Єроніма Стридоньского, яка ся містит на нижнім поверху церкви на Воли. Част декораций то фіґуральны поліхроміі, што представляют євангелистів, апостолів, пророків і святых та біблийны сцены і сцены з жытя Богородиці. В олтари поміщена є ікона Божой Матери Оранты та архангелы. Поліхроміі в церкви на Воли сут ефектом теолоґічных роздумувань і приязни артисты з товдышнім парохом о. проф. Юрийом Клінґером, возникли уж в 1954 році. В 1979 році, коли повекшыли нижню церков, Новосільскій доробил іщы розпис в части храм вірных. Што важне, поліхромія в олтари єст єдном з першых самодільных поліхромій артисты. За консерватором проф. др габ. Якубом Левіцкым «декорациі каплиці треба зачысляти до найвыдатнійшых творів в творчости Новосільского».

Другій етап робіт при Загородах Сил Натуры

Креницкы Загороды Сил Натуры на Парковій Горі будут розбудуваны. Реализация проєкту зачала ся в 2020 році. На схылі Парковой Горы поміщене было специяльне ґратя, завдякы котрому одвиджаючы можут робити досвідчыня і познавати діяня сил натуры. Побудуваны были і видокова плятформа, зовнішня силовня і спацеровы алейкы. В Загородах помістили і мініятуры найбарже характерных креницкых обєктів. Тепер завдякы дофінансуваню з Польского Ладу, в высокости 5 млн злотых, має рушыти другій етап робіт. В рамках розбудовы будут доданы атракциі для біциґлистів, зовнішні силовні, місця до одпочываня і спацеровы алейкы.

Ґорлицкій бургомайстер в першій десятці найліпшых власти в Польщы

В десятій едициі загальнопольского ранкінґу Денника Ґазеты Правной «Перлины Самоуряду» бургомайстер Ґорлиц Рафал Кукля занял высокє 8. місце в катеґориі «найліпшы власти» в містах до 100 тис. жытелів. То уж другій раз, як бургомайстер Ґорлиц нашол ся в першій десятці найліпшых власти в Польщы, влони занял в тій самій катеґориі 6. місце. Во влонишній едициі Ґорлиці были доцінены і 1. місцьом в ранкінґу «Медияльна Перлина Самоуряду» і выріжнены в катеґориі «Лідер Комунікациі і Промоциі».