Сумар дня на 19. мая 2022 р.

Приносиме вам сумар медияльной ґрупы ЛЕМ.фм+ на ден 19. мая 2022 р.

В пятницю зачне ся креницкє Бієнале

Уж заран одкрыте буде ХІ Медженародне Бієнале Лемківской/Русиньской Культуры, інформуют о тым Стоваришыня Лемків і Світова Рада Русинів – головны орґанізаторы подіі. Орґанізувана што два рокы стріча Русинів з ріжных держав Европы і ЗША то нагода на промоцию русиньской культуры, выміну опіній і поглядів, але і нагода близше познати Лемковину, єй люди і звыкы. Концерты попереджены будут, традицийні, панахідом на гробі Епіфана Дровняка, пак зложыньом квітя при памятнику маляря. В пятницю переданы будут і дві цінны русиньскы нагороды – премія ім. Василя Турока-Гетеша признавана для вызначных діячів та нагорода Pro Arte Ruthenorum, яка належна є найліпшым русиньскым творцям культуры. Субота буде посвячена дискусиям і выміні поглядів. В тот ден одбуде ся і засіданя Світовой Рады Русинів. ХІ Бієнале закрыє третій концерт. Вшыткы концерты будут проходити в Старым Здройовым Дому.

Высова і Вапенне з цінным дофінансуваньом

Курорты в ґорлицкым реґіоні позыскали цінны фінансы, якы дозволят розвинути такы місця як Высова і Вапенне. То єдны з основных курортів на середущій Лемковині. Грошы походят зо специяльного фонду, якій направленый єст на вшыткы здройовы ґміны в Польщы. Як подає ґміна Санкова, на обшыри котрой находит ся курорт в Вапенным, цілу суму хотят передати на будову ок. 300 метрів стежкы в коронах дерев. Покля што не знатя докладні, де она буде. Ґміна Устя Рускє отримала грошы на два высівскы проєкты. То будова солянковой інгаляториі і модернізация фонтанны в парку. Другій з проєктів – здає ся цікавшый – то розбудова і ремонт водного парку в Высовій, якій од парох років з технічных причын не може быти хоснуваный.

«Маівка» в Реґєтові

В найблизшый вікенд в Реґєтові одбуде ся «Маівка» в місцевій стаднині гуцульскых кони. В рамках подіі пройдут кваліфікациі до V Чемпіонату Польщы Коня Гуцульской Расы. Проґрам імпрезы зачне ся в суботу частю, котра посвячена буде презентациі конів, а аж на сам вечер о 20.00 год. зачне ся в місцевій корчмі гулянка. В неділю о год. 8.30 одбуде ся властива част Чеміонату, пак конкурсы ізды, офіцияльне привитаня гости і выступы. В рамках додатковых атракций будут ярмак ремесла, презентация загыбаючых професий, як тіж активности для діти. Одбуде ся і харитативна акция – з продажы кіста дохід буде презначеный на лікуваня «Юзя з Брунар».

Одсвяткували памят о блаженным Василі Гопко

В Грабскым, рідным селі блаженного мученика грекокатолицкой Церкви Василя Гопка, в мунилу неділю одбыл ся архієпархіяльный одпуст Пряшівской Архієпархіі. Того рока повязаный был зо святкуваньом 75. річниці єпископского рукоположыня владыкы Гопка, котре принял 11. мая 1947 р. з рук товдышнього пряшівского єпископа Павла Петра Ґойдича в Пряшові. Архієрейску літургію одправлял владыка Петро Руснак, апостольскій адміністратор Пряшівской Архієпархіі, участ брал і емеритуваный архієпископ Йоан Бабяк та священникы з близкой і далекой околиці.