В Будапешті ішли по слідах Русинів

В середу 11-го мая 2022-го року одбыла ся в Будапешті подія, котру орґанізовала Бібліотека Русинів Мадярьска імени професора Іштвана Удварі під назвов По слідах Русинів у світі – Русиньскы памятны місця на Підкарпатю, Словакії, в Польщі, Войводині і Мадярьску.

Подія одбыла ся в будапештяньскій Вседержавній бібліотеці чуджіх языків, і на участных чекали штири інтересны рефераты.

Наперед із приговором привітала участных Анна Марія Поп, котра є директорков Вседержавной бібліотекы чуджіх языків, в якій просторах подія проходила. Книгы, котры бісідують о русиньскых памятных місцях і суть у фонді русиньской бібліотекы, одпрезентовала їй директорка Ілдіка Поланскіне Надош.

За вызначны русиньскы місця на Підкарпатя бісідовала у своїм рефераті Жофія Чорі, кандідат педаґоґічных наук із Мукачівской державной універзіты. О нашых памятных місцях на Словакії могли участны выслухати реферат, котрый приготовила співробітничка Научного інштітуту імени Антонія Годинкы Іріна Сюч-Ворінка.

Янош Ґашпар, председа Кураторьской рады мадярьского фонду културы громадного транспорту, занимав ся у своїм выступі русиньскыма памятныма місяцми в Польщі, Войводині і Мадярьску.

Подія была орґанізована русиньсков бібліотеков з підпоровов мадярьской влады і Фонду Ґабора Бетлена.

Фото: Вседержавна бібліотека чуджіх языків.