«Слово» – Неділя розслабленого – неділя, 9.00 год.

Неділя розслабленого або невладного. Ісус приходить до Єрусалима на праздник. Заходить на місце зване Вівтезда, де была вівча купальня овець, котры мали быти жертвованы в Єрусалимскім храмі.

Было там пять дворців, де ся находило много хворых. Ангел Божый сходив на часы і сколотив воду. Першый хворый, котрый вошов до воды по сколочіню, быв выздравелный од каждой хвороты.

Но Ісус там увидів чоловіка, котрый там довгы рокы лежав невладный. Його ся звідує: Хочеш выздравити? Но хворый одповів: Не мам чоловіка, котрый бы ня зніс до воды, як ся сколотить вода, покы я там сам прийду іншый мене спередить. А Ісус йому повів: Встань, возьмий свою постіль а ідь.

А хворый послухав, увірив Ісосовым словам. Встав, взяв постіль а ходив. Но была субота. Котры його виділи, йому сперали. Він ся одкликує: Тот, котрый ня выздравив, мі повів. Але хворый не знав, хто його выздравив. Ісус його находить в храмі, де пришов подяковати за своє выздравліня Господу Богу. А єдночасно го напоминать: Смоть, єсь здравый, веце не гріш, жебы ся з тобов не стало дашто гірше.

З тых слов є явне, же тот чоловік терпів за свої гріхы. А Ісус йому дав не лем здравя тіла, але головно здравя душы. В тых словах встань, є і здравя про душу, одпущіня гріхів. А з тым напомянутя, же може прийти на нього іщі дашто страшніше, як то, што терпів дотеперь. А тото страшніше є вічне проклятя в пеклі.

Так днешня неділя указує нам на Божу любов ку грішникови. Хоць бы дахто і десять, пятьдесять, або і сімдесять років быв в рабстві гріха а прийде ку Ісусови до тайны покаяня, такый тыж учує слова: Встань, твої гріхы суть одпущены. Зачний новый жывот. Але мерькуй, легковажно ся не вертай назад до гріха, жебы тя смерть не нашла в такім ставі а жебы ся з тобов не стало дашто гірше. Хрістос воскрес!

В неділю, 15. мая 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. мая о 12.00 год. і 16. мая о 2.00 год. за русиньскым часом.