Варголь і абсолютный рекорд

На понедільковій авкциі нюйоркского авкцийного дому Крістіз образ Енді Варголя продали за рекордову ціну – 195 млн дулярів. Знаный образ Мерилін Монро «Shot Sage Blue Marilyn» єст тым самым найдорожше проданым в публичній авкциі твором штукы ХХ ст.

Як сме заявляли в марци тр., попередні властителі образу, Фундация Томаса і Доріс Амманів з Цуріху, хотіли зачати ліцитацию од квоты 200 млн дулярів. Кінцьова ціна, за яку пішол образ, то 195 млн дулярів, што по додатню податку дає як раз суму близко 200 млн дулярів. Авкция тырвала лем 4 минуты, а проходила в сідибі дому Крістіз в самым серци Мангатану в Ню Йорку.

Варголь перед Пікассо, але за да Вінчі

Ціна портрету Мерилін Монро бє попередні рекорды продажы творів штукы ХХ ст. Образ «Альжырскы жены (версия 0)» Пабльо Пікассо продали в маю 2015 р. за 179,4 млн дулярів, а образ «Обнажена жена» Амадео Моділяні за 170 млн дулярів.

Неквестийонуваный рекорд для выставленого на авкцию твору штукы належыт єднак до Леонардо да Вінчі. За його «Спасителя світа» купец дал в листопаді/новембрі 2013 р. аж 450,3 млн дулярів.

Постріленый портрет

«Shot Sage Blue Marilyn» Енді Варголь намалювал в 1964 р., два рокы по траґічній смерти звізды Голивуд. Портрет Монро зробил Варголь на основі знимкы акторкы з промоциного фільму «Няґара» з 1953 р. Намалюваный в техніці серіґрафікы і акрильовом фарбом «Shot Sage Blue Marilyn» є єдным з пятьох портретів в жывых, міцных кольорах.

Штырі з пятьох «Shots» z 1964 р. взяли своє названя од інциденту, што стал ся іх леґендом. До працовні Варголя, Фарбикы, пришла Дороті Подбер, котра звідала, ци могла бы сфотоґрафувати образы (є то словна гра, бо американьска перформерка схоснувала анґлицкє shoot, што значыт стріляти, але в бесідуваным языку тіж зробити знимку). Пак вытягнула револьвер і зачала стріляти до серіґрафік.

Днес, без одповіднього ґратя, голым оком, не видно уж слідів стріляня.

Для діти

Проданый портрет голивудской звізды кіна є частю выставленой до проданя колекциі Фундациі Томаса і Доріс Амманів, фундациі названой по Томасі Аммані, приятелю Варголя, та його сестрі Доріс. Цілый дохід з продажы має піти на благодійны ціли. Трафит до фундациі, котра подля Крістіз, занимат ся «підтримуваньом жытя діти» через здоровля і едукацию.

Рекорд тыкат так само ціны, яку осягнули за саму Варгольову творчіст. Попереднім было 105 млн дулярів, за якы в 2013 році продали серіґрафіку Варголя пн. «Silver Car Crash».

Фот. PAP