Сумар дня на 4. мая 2022 р.

Приносиме вам сумар медияльной ґрупы ЛЕМ.фм+ на ден 4. мая 2022 р.

Битва, што мала наслідства так само для Лемковины

В понедільок, 2. мая, ґорлицка земля споминала Битву під Ґорлицями і помершых в ней жолнірів. В передден річниці битвы на войсковым цмонтери но 91 оддати пошану помершым были м.ін. Ґорлицкій Староста Мария Ґубала і ведучый Рады Ґорлицкого Повіту Вітольд Кохан. По екуменічній молитві присутны делеґациі зложыли квітя в центральным місци цмонтеря. Войсковый цмонтір но 91 на верху Корчак то єдна з красшых воєнных некрополий з часу І світовой войны. Лежат гын жолніре армій трьох імперий: Австро-Угорской, Німец і Росиі. Похованых є гын веце як 425 жолнірів австро-угорской арміі, 287 росийской і 140 німецкой арміі. Битва під Ґорлицями была зворотным пунктом боів, якы проходили на одтинку фронту, котрый вюл од хырбета Карпат через Маластівску Маґуру, Ґорлиці, Лужну, Сташківку і Ґромник. В значучій мірі вломила она росийску ініциятиву, царска армія уж николи веце на загорозила центрови австро-угорской імпериі і николи не зближыла ся до обшыри Лемковины. Битва то не лем страты в жолнірях, якы ся рахує на 25 тис. помершых (трьох армій). То тіж великы материяльны страты і терпліня цивілів на обшыри великой части Лемковины.

В Малопольщы єст безпечні

Початок мая то час офіцийного одкрытя туристичного сезону Малопольщы. «В Малопольщы каждый найде штоси для себе. (…) Нихто не повинен мати вантпливости, што Малопольща єст найкрасшым туристичні реґіоном» – заґарантувал маршалок малопольского воєвідства Вітольд Козловскій. 1. мая выстартувала загранична промоцийна кампанія Малопольщы і Кракова. Єст она реализувана в рамках проєкту «Малопольща – ціль подорожы». Перше кампанія обойме бритийскій і німецкій рынок, зато што туристы з тых держав найчастійше одвиджали в остатніх роках наш реґіон. Маршалківскій Уряд подає, што од моменту выбуху войны туристична бранжа в Польщы боре ся з проблемом масового одкликуваня резерваций туристами, аж і тых заплянуваных на пару місяців допереду, в вакацийным періоді. Цілю кампаніі є м.ін. вказати, што кажде село в Малопольщы є безпечне, одкрыте, а реґіон гостинный і толеранцийный.

Як могли выглядати люде, котры приіхали або котрых привезли по войні на стацию в Любіні?

Близко стациі в Любіні од понеділька мож видіти выставу пн. «Любіньскы піонєры 1945», котра вказує головні тото, як могли выглядати люде, котры приіхали або котрых привезли гын по войні. Реализатор выставы, Історичный Музей в Любіні подає, што експозицию творили на основі документів і реляций люди. За президентом Любіна Робертом Рачыньскым выстава в мудрый спосіб вказує просторову історию, одтварят місця, в котрых приізджали люде зо сходу на захід. Роботы над выставом тырвали веце як 4 рокы, але буде она фурт пошырювана і дополнювана. Пленерова експозиция поміщена є в деревяных ваґонах та на чысленных стоячых пляншах на обшыри при желізницьовій стациі.

З Польковиц до Любіна аж і 120 км/г