Сумар дня на 29. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 29. квітня/апріля 2022 р.

Становиско СКУтНіЕМ в справі дискримінациі нацийональных меншын на Білоруси

Члены Спільной Комісиі Уряду та Нацийональных і Етнічных Меншын в Польщы подали своє становиско в справі дискримінациі нацийональных меншын на Білоруси, в тым польской меншыны, в обшыри вчыня меншынового языка і в языках меншын. Як пишут, ліквідация вчыня в языках меншын та ограничыня вчыня материньского языка до єдной годины на тыжден порушат основны права громадян Білоруси, якы належат до нацийональных меншын. Меншынова страна Комісиі высловлює свою солідарніст з нацийональныма меншынами жыючыма в білорускій державі. Представникы меншын в польскым уряді подают тіж, што розуміют обуріня і страх польской меншыны на Білоруси, в звязку з тым, што подібна ситуация є так само і в Польщы – то ограничыня доступу до вчыня языка німецкой меншыны. Писмо закінчене є апельом до уряду Білоруси стримати ся од діянь, котрых цілю є асиміляция, значыт в практиці русифікация нацийональных меншын, в тым автохтонной польской меншыны на Білоруси.

Своі улиці в Мукачівскій Містскій Територияльній Громаді будут мали русиньскы діячы

Як подали на сайті Мукачівской Містской Рады, в Мукачівскій Містскій Територияльній Громаді переменували 79 улиц, котры были названы по совітскых або росийскых діячах. Медже тыма, котрых мено будут носити по новому улиці, найдеме і вызначных Русинів, якы сут повязаны з австро-угорском історийом той териториі. Свою улицю буде мал найвекшый нацийональный будитель Русинів Александер Духнович. Інча улиця буде носила мено Іоанна Семедія, колишнього єпархы Мукачівской Грекокатолицкой Єпархіі, русиньского патріоты. Свою улицю буде мал і Юрий Чорі, родак з Фоґораша (днес Зубівка), вызначный русиньскый писатель, етноґраф, фольклориста, драматурґ, автор русиньского словника в пятьох томах. Свою улицю буде мал і Павел Цібере, родак з села Залуж, вызначный русиньскій правник, дипломата, політичный і культурный діяч. В часі ІІ світовой войны вєдно з Геліодором Піком намагал ся о высвободжыня Русинів з ґулаґів, і іх долучыня до армадного корпусу ґенерала Людвіка Свободы, протестувал в Москві проти анексиі Підкарпатской Руси.

Выремонтуют дворці в Долині Попраду

Рушыл ремонт дальшых шестьох дворців в Долині Попраду – в Милику, Млодові, Пивничній, Старым Санчу, Жеґєстові і Жеґєстові-Здрою. Подля проєкту має быти змодернізуваных разом 12 дворців. На початку квітня/апріля рушыли працы при трьох першых: в Зубрику, Рытрі і Барціцах. Част історичных обєктів буде перебудувана, новы дворці будут побудуваны в Милику і Млодові. Цілковитый кошт інвестициі то 60 млн зл, з чого 37 млн єст з европейскых фундушів.

Авторска стріча про акцию «Вісла» в Музею Никыфора в Креници

В четвер, 5. мая, o 17.00 год. в Музею Никыфора в Креници одбуде ся авторска стріча з др Анном Вільк з Мушыны, науковом працівничком Університету Мариі Кюрі-Склодовской в Люблині. Стріча буде тыкала акциі «Вісла» і єй консеквенций. Вступне платне злотівку.

Джерело фотоґрафіі: https://osce.usmission.gov