«Слово» – Квітна неділя – неділя, 9.00 год.

Пятніцю того тыждня сьме закончіли святу добу Штиридцятніці. Од понеділька вступуєме до другой частины святого посту – Страстного тыждня.

Субота і неділя перед Страстным тыждньом нам говорить о двох великых подіях – Воскресіня Лазаря і Квітна Неділя. Ісус пришов до Віфтанії воскресити Лазаря, котрый уж штири дні быв у гробі. Коли Марта і Маруя послали за Ісусом, же тот, котрого любиш, є хворый, Ісус чекав, покы Лазарь умре, а аж так іде.

Людьскым розумом тото тажко зрозуміти. Але Боже думаня не є нашым думаньом. Ісус не подав здравя тілу, але робить векше діло. Воскрешать мертвого на четвертый день. Тоту подію виділо много Жыдів. Бо наставав час Пасхы і велике множество народа ся сходило до Єрусалима. А так, коли чули о Хрістови а о тім, же воскресив Лазаря, а дізнали ся, же сходить до Єрусалима, выберають ся ку ньому. Одвертають ся од Єрусалимцкого храму, од старозавітных обрядів і свій погляд обертають ку Оливній горі. Вшыткы прославляють Хріста, ученикы йому кладуть свої плащі на дорогу, многы ріжуть палмовы голузкы і кличуть: Благословленый Царь Ізраіля. Чекають, же прийде ослободжіня, же слава Ізраіля буде привернута.

Они не розумлять, же Ісус не іде перевзяти земне царьство, але приходить ослободити з рабства діавола, гріху і смерти. А так тот самый народ за штири дні буде кричати – не маме царя, лем цісаря.

Одвертайме ся і мы од того світа, од думаня того світа. Обертайме свій погляд ку Хрістови. Але не з очекованьом, же ся наповнить моя воля. Же сам Господь буде выповньовательом мойой волі. Але так, як то повіла Марія: Най буде мі подля твойого слова. В каждій сітуації хочу повнити твою волю, Боже. Най не буде так, як я хочу, але най ся Твоя воля діє на мі. Най буде то, што мі є хосен мойой безсмертной душы.

А втогды не будеме розчарованы. Але в каждій сітуації будеме в щірости сердця кликати: Осана, благословленый, котрый іде в імени Господа. Слава Ісусу Хрісту!

В неділю, 17. апріля 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. апріля о 12.00 год. і 18. апріля о 2.00 год. за русиньскым часом.