«Слово» – 5-та неділя Великого посту – неділя, 9.00 год.

Пята неділя Великого посту нам подавать барз важну науку про наш духовный жывот, а то о правдивім першенстві. Ісус, ідучі по дорозі до Єрусалима, одкрыто бісідує своїм ученикам, што його там чекать. Бісідує о своїх муках.

А двоє із його учеників приступають ку ньому окремо од іншых, і в тихости його просять. Зроб нам тото, о што тя хочеме просити. Ісус добрі знав, што они задумують, але жебы указав зло в повній наготі, доволює тот вопрос і сам реаґує як тот, котрый не знать: А што то мать быти? А они: Дай нам в твоїй славі сидіти по твоїй правій і лівій стороні. На тото Ісус одповідать: Не знате, што то вы просите. Ці можете пити чашу, котру я пю, або дати ся крестити крещіньом, котрым я ся крещу? А они одповіли, можеме. Ісус їм одповів: Будете. Но дати вам сидіти, не є моїм ділом.

Іншы ся мерзили на нах, же сі доволили таке просити, а хотіли мати векшу славу і поставліня. Не были веце духовны, але ся проявила зависливость. Ісус на тото вшытко, што ся теперь одбыло з його найблизшыма учениками, повів: Посмотьте на владыків народів, як они панують над нима. Мають першенство моці, пінязь, страху. Но меджі вами най не буде так. Хто хоче быты меджі вами векшый, най буде каждому слуга. А хто першый – най буде каждому рабом.

Ісус не сперать прягнути першенства, але указує, в чім є правдиве першенство. В служіню, любви, покорі. І нас ся звідує: Можете пити мою чашу? Хочете пити мою чашу? Чашу понижіня, одвергнутя, погорджіня од другых? Кедь хочете быти справды першыма, наслідуйте мій приклад. Бо і я єм не пришов, жебы мі служыли, але пришов єм послужыти і дати свій жывот за многых. Хочеме тогды іти дорогов правдивого першенства?

В неділю, 10. апріля 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. апріля о 12.00 год. і 11. апріля о 2.00 год. за русиньскым часом.