Сумар дня на 5. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 5. квітня/апріля 2022 р.

Єрархы Американьской Православной Церкви осудили войну на Украіні

Синод Єпископів Американьской Православной Церкви выдал 27. марця тр. специяльный комунікат в справі войны на Украіні. Як в ним пишут, ниякій християнин не може быти безсторонный в ситуациі розвиваючой ся гуманітарной кризы, терпліня ани зла, котре єст роблене в часі аґресиі Росийской Федерациі на Украіну. В звязку з тым Єрархы осудили войну, яка спричынят смерт і знищыня, дотыкаючы мілийонів невинных люди. Синод солідаризує ся з цілым украіньскым народом і політичныма лідерами Украіны та підтримує митрополиту кыівского і цілой Украіны Онуфрия. Єрархы американьской Церкви потвердили інформацию о высланю митрополитом цілой Америкы і Канады Тихоном писма до патріархы московского Кірила. Голова Американьской Православной Церкви попросил в ним росийского єрарху підняти вшелеякы діяня, што мают на ціли завершыти войну, терпліня і смерт вельох жертв росийско-украіньского конфлікту.

Лемківска поезия в шлезскым языку

На выдавничым рынку явила са нова цікава позиция Выдавництва Варшавского Університету. «Лемківска душа» то выбраны вершы переведены на шлезскій язык Варфоломійом Ванотом. То двотомова збірка вершів авторства Петра Мурянкы, якы ориґінально были написаны в лемківскым языку, а тепер переведены сут до шлезского языка. Як мож чытати в описі публикациі на інтернетовым сайті выдавництва, вершы приближают чытачам меншынову літературу і языково-культурову ріжнорідніст Польщы. Публикация має одкрыты лемківскій світ для шлезскых одберачів, найчастійше нияк незазнаєменых з Лемковином.

Нагороджены найліпшы проєкты зреализуваны в Малопольщы з европейскых фондів

В пятницю, 1. квітня/апріля, в Малопольскым Центрі Культуры «Сокіл» в Новым Санчы прошла ґаля «Фонды з Культуром», вчас котрой Маршалок Малопольщы Вітольд Козловскій вручал статуі лавреатам плебісциту «Европейскы Фонды сут в Малопольщы». Нагороджены были найліпшы в оціні мешканців проєкты зреализуваны од 2014 рока з середків Евросоюзу. Три статуі трафили до ґорлицкого повіту, жытелі Малопольщы доцінили м.ін. зміны в інфраструктурі над озером в Климківці. Окрем того доцінены были і проєкты звязаны з поправом доступности і якости медичных услуг реализуваных шпыталями м.ін. в Новым Санчы ци Креници. Жытелі достерегли тіж культурны і рекреацийны інвестициі, напр. модернізацию Центра Культуры Сокіл, ревітализацию парку Бєхоньского в Ґорлицях ци будову туристичных трас в Креници.

Ґорлицкій Центр Культуры ремонтуваный

Вчера зачал ся долгожданый ремонт Ґорлицкого Центра Культуры. О ревітализацию місто старало ся уж в 2018 р., єднак фінально поведе ся тото аж тепер. В рамках ревітализациі окрем інчого змодернізуваны будут внутрішні інсталяциі, замонтувана климатизация і вентиляция, будинок буде достосуваный до потреб неполносправных осіб і до актуальных вымогів санітарных, безпекы і протипожарных. Додатково появлят ся м.ін. новы танцювальны салі, студийо награнь і конференцийны салі, змодернізуваны будут м.ін. видовискова саля, кіно і кавярня. Кошт інвестициі то близко 13 млн злотых.