«Слово» – 4-та неділя Великого посту – неділя, 9.00 год.

На третю постну неділю нам Свята Церьков указує на крест, жебы сьме із нього черьпали посилу до далшых днів святого посту. Бо смотрячі на крест, на знак побіды, припоминать нам, же уж є близко Пасха, близко є воскресіня.

Днешня уж четверта неділя є про нас далшым підкріпліньом, котре порозумиме, аж кедь зайдеме на глубину днешнього слова.

Ку Ісусови приступує чоловік – отець дітины, котру мукарить довгый час нечістый дух. Тот отець чув о Ісусовых ділах, а так собі говорить, то є моє послідня надія. Но коли пришов, Ісус там не быв, бо в тім часі взяв трьох учеників на гору Тавор. Так тот отець приходить зо своїм сыном ку Його ученикам, но они йому помочі не могли. А як ся ку тому придав і крик і высміваня архієреїв і фарізеїв, його віра ся розсыпала на дрібненькы фалаточкы. А коли Ісус пришов тот отець реаґує – кедь можеш, помож нам. Ісус на тото одповідать – кедь можеш, вшытко є можне, хто вірить.

Тоты слова знова обновлюють розбиту віру в тім отцьови а він реаґує – вірю, помож мойому невірству.

Може собі тото отець усвідомив велкы чудесны діла, о котрых чув, же їх Ісус зробив. А так говорить вірю, але свідомый сі свойой слабости додав – помож мойому невірству. На то Ісус выздравлять його сына.

Діавол якбы нашептавав – даремно віриш, ани Він тобі уж не поможе. Ісус видячі, што одбывать ся в його внутрі, говорить йому о потребі не падати на духу. А тото є одказ і про нас. Діавол ся снажыть навести до нашой душ думкы похыбности. Тото не звладнеш, даремно ся постиш, ты хочеш робити покаяня, ты ся хочеш поліпшати? Ани не думай на таке.

На тото нашептаваня злого і нам треба зареаґовати: Вірю Тобі, Господи Ісусе, же Ты єсь владыка неба і землі. Так ся то молю, так вызнавам словами, але помож мойому невірству, мойой малодушности, котру указую своїма ділами. Слава Ісусу Хрісту!

В неділю, 3. апріля 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. апріля о 12.00 год. і 4. апріля о 2.00 год. за русиньскым часом.