«Украіньскє козацтво» Мирослава Трохановского

Перед даякым часом інформували сме, што в Ґорлицях одбуде ся выстава творів Мирослава Трохановского пн. «Місто нескінчене», яка тематично вяже образы названы як «Поліс». О тій выставі мусиме повідати уж в минулым часі, в єй місце неодолга будеме мочы видіти штоси рівно інтересуюче.

Отже, як інформує автор, в звязку з войном на Украіні рішыл він змінити тематику свойой ґорлицкой выставы і вказати цикль образів пн. «Украіньскє козацтво». Вернісаж одбуде ся уж о два тыжні.

Козакы і козацтво

«Хочу тым самым вказати моє спертя для воюючой Украіны і запрезентувати выбраны працы інспіруваны історийом єй Козаків. Моя фасцинация том темом сігат іщы дітячых років. Одколи памятам, од часів вчасного дітинства, моім облюбленым образом был твір Ілиі Ріпина пн. «Запорожці пишут лист до турецкого султана», подає в описі свойой выставы.

М. Трохановскій не вкрыват захопліня історийом Козаків і традицийом повязаном з іх діяльністю. Вчас ґорлицкой выставы, яка буде вказана в Ґалериі Штукы Двір Карвациянів, запрезентуваны будут рисункы і образы творены протягом долгых років.

Видіти будеме мочы так образы представляючы поєдных Козаків, як тіж баталистичны сцены, выправы на чайках, а тіж пару версий темы «Козак Мамай». Трохановскій подає, што як раз тото представліня є барз цікаве, выходяче з украіньской народной штукы інспіруваной традицийном іконом. Тема пресякнена є чысленном символиком, яка оддає духа традициці козацтва.

Вернісаж выставы одбуде ся 14. квітня/апріля. Tворчіст Мирослава Трохановского буде мож видіти до 11. мая 2022 р.

В звязку зо зміном тематикы выставы, фурт можете сперати выданя принагідного каталоґу. Збірка потырват іщы пару дни. Біоґрафію Мирослава Трохановского найдете за тым мотузком.