«Слово» – 3-тя неділя Великого посту – неділя, 9.00 год.

Третя неділя святого посту ся называть Недільов Крестопоклоннов. На утрені ся выкладать на тетрапод Святый Крест, котрый ту буде через цілый тыждень.

Чом Свята Церьков указує в тім тыждню преполовенія посту Святый Крест? Указує на наше посилніня в постнім подвигу.

Хто бере важні постный час, з Божов помочов перемагаючі свої страсти, посить ся тілесным і духовным постом, як бы помалы зачали уменшати ся силы. Ту приходить Свята Церьков як добра мати, котра указує на Крест. На Крест не як знак терпіня, але побідный знак. Указує нам так, же уж є близко Пасха. Уж недовго треба ся понамагати і прийде час радости Воскресіня.

Але тыж указує нам Крест, як посилу і в нашім ціложывотнім подвигу духовного жывота. Якбы нам говорячі – уж недовго, скоро перейде тот жывот і наступить вічна Пасха. Лем треба вытримати.

Того тыждня сьме праздновали святых штиридцять мучеників севастійскых. Коли были у вязніці, Ісус ся їм появлять у своїй славі аж два раз, жебы їх посилинти, але і напомянути – вытримайте лем курто, а будете зо мнов царьовати навікы. Хто вытримать до кінця, буде спасеный. А коли были посланы на замерзнуте озеро в ночнім морозі нагы, они з радостьов ішли, мали перед собов видіня Господа, Його славу, а куртый час мук. Прославляли Бога. Но єден із них дав ся поїмати до сітей діавола. Перестав смотрити на побіду Креста. Діавол його одвів в думках ку земному, видів уж не славу Господа, але лем курты мукы, котры мусив зношати на тім озері од холоду. А так ся розбігнув, одділив ся од них, а там го чекали выгріты комнаты, котрых собі не ужыв. Бо утратив земный і небесный жывот. Но Господь взбудив у єдного із вояків, котры дозерали над святыма мучениками, з берега прягнутя заповнити тото місце, а так прияв мученицкый вінець.

Свята Церьков нам указує приклад тых святых мучеників на хосен і про нас. Смотьме і мы на тот знак побіды, коли діавол хоче внести похыбности до нашого внутра і одвести з дорогы спасіня. А з Креста звучіть – лем курто, барз курто, а чекать тя вічна Пасха, вічна радость, вічне блаженство. Слава Ісусу Хрісту!

В неділю, 27. марца 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. марца о 12.00 год. і 283. марца о 2.00 год. за русиньскым часом.