Русиньска делеґація з Румунії в Сербії обговорила і орґанізацію СКР

Як інформовала аґентура Рутенпрес, минувшый тыждень у Новім Саді новый председа орґанізації Руска матка Михайло Фейса привітав представителів Културного товариства Русинів Румунії на чолі із своїм председом Ґеорґійом Фірцаком.

В делеґації із Румунії были окрім председы отець Василь Бойчук і секретарька Ана Мунд. Стріча, котра была подля Фейсы конштруктівна, проходила якраз в місті, в котрім в році 2023 одбуде ся 17-ый Світовый конґрес Русинів.

Орґанізація конґресу была єднов із головных тем стрічі председів двох партнерьскых орґанізацій, котры суть членами Світового конґресу Русинів.

Орґанізовати хотіли двоми кандідаты

Припоминаме, же в році 2021 на конґресі в Криниці было Світовов радов Русинів схвалене, жебы слідуючій конґрес у 2023-ім році проходив у Румунії. Делеґаты з Румунії втогды арґументовали тым, же уж мають забезпечене фінанцованя конґресу, што про жадну членьску орґанізацію не суть малы вытраты. І зато Світова рада Русинів тоту кандідатуру підтримовала.

Но перед голосованьом делеґатів, котры мали рішіня Світовой рады уж лем потвердити, теперішній председа орґанізації Руска матка Михайло Фейса пожадав, жебы могло голосовати ся і о Новім Саді як місті, котре буде гостити слідуючій конґрес. Фейса арґументовав окрім іншого і тым, же Новый Сад буде мати тітул Европске головне місто културы. Тот тітул має Новый Сад в році 2022.

Дві делеґації, котры мали інтерес орґанізовати конґрес в році 2023, не доїднали ся ани копромісі, жебы конґрес быв на двох місцях, як то уж было і в минулости, кедь ся засіданя конґресу розділили меджі Сербію і Хорватію. По комплікованых діскусіях наконець в голосованю делеґаты потвердили слідуючій конґрес у Новім Саді.

Третій день бы міг быти в Румунії

Як теперь выходить із інформацій аґентуры Рутенпрес, од думкы робити конґрес на двох місцях ся предці лем не одышло цалком.

Член делеґації із Румунії отець Василь Бойчук на стрічі з Михайлом Фейсом припомянув, же Русины в Румунії у 2023-ім році будуть святковати сторічніцю Ґрекокатолицькой церькви. Зато попросив председу орґанізації Руска матка, жебы третій день 17-го Світового конґресу Русинів міг одбыти ся в Румунії. В Румунії бы ся могла в рамках конґресу одлужыти і літурґія.

Председа Културного товариства Русинів Румунії Ґеорґій Фірцак на кінцю стрічі покликав Фейсу, жебы вєдно із представительом Сербії у Світовій раді Русинів Дюром Папуґом брав участь на слідуючім засіданю Світовой рады. Тото має одбыти ся в Криниці в місяці май того року, в часі, коли там буде проходити Бєнале русиньской/лемківской културы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА