Сумар дня на 21. марця 2022 р.

Приносиме вам сумар медияльной ґрупы ЛЕМ.фм+ на ден 21. марця 2022 р.

Апель Митрополиты Савы до Патріархы Кірила затримати войну на Украіні

Православный Митрополита Варшавскій і Цілой Польщы Сава звернул ся 14. марця в імени Польской Автокефальной Православной Церкви до Патріархы Московского і Цілой Руси Кірила з просьбом піднести свій патріаршый голос, жебы война на Украіні, ведена Росийском Армійом, была затримана. Як пише в офіцийным писмі до Патріархы Кірила митрополита Сава, не може быти, жебы два славяньскы православны народы, выходячы з єдной хрестительниці од св. князя Владиміра вели братовбивчу войну.

Просиме Вас підперти нашу активніст в обшыри гуманітарной помочы для Украіны

Як бурсакы і Стоваришыня «Руска Бурса» в Ґорлицях од початку войны анґажуєме ся в діяня гуманітарной помочы для Украіны, але потребы з годины на годину роснут, зато хочеме іщы барже пошырити нашы діяня. Звертаме ся до Вас з прошыньом підперти нашу активніст. Поміч од нас трафила уж м.ін. до самого Кыйова ци на Підкарпатску Русь. Грошы можете вплачати на PayPal Руской Бурсы. A конкретны річы (як продукты до іджыня з долгым терміном придатности, косметикы ци домашні хімічны середкы) просиме приносити до Бурсы (штоденно в год. 10-14) або до склепу RSCars в Бічы. Дякуєме!

Публикация про місця де жыли і жыют Русины доступна онляйн

Книжка пн. «Карпаторусиньскы поселеня. Листа сел і міст в Центральній Европі, де днес жыют або даколи жыли Карпаторусины» єст доступна до побраня дармо в електронічній версиі. Листу зрыхтувал і зредаґувал др. Михаіл Капраль. Книжка была печатана влони в Будапешті Вседержавным Русиньскым Самосправуваньом та Русиньскым навчальным інститутом імени Антония Годинкы. Підпорили ю Правительство Мадяр, Вседержавне Русиньскє Самосправуваня і Говоркыня Русинів в мадярскым Парляменті Віра Ґіріц. Книжка написана є головно в русиньскым і мадярскым языках. Листа сел і міст поділена єст подля держав, в якых ся актуально находят: Хорвация, Мадяры, Польща, Румунія, Сербія, Словация і Украіна. Званя місцевости сут поданы в русиньскым і мадярскым языку та офіцийным языку державы, в якій ся днес находят. На кінци публикациі в подякуванях за вклад в возникніня книжкы автор подякувал і членам нашого Стоваришыня «Руска Бурса» в Ґорлицях, під ведіньом Наталиі Малецкой-Новак.

Черговый семінар «Вколо Новосільского»

В тоту пятницю, 25. марця, о 19.00 год. в Музею Ікон в Варшаві при ул. Лелеховскій 5 одбуде ся традицийный семінар «Вколо Новосільского». Тот раз буде він на тему «Візантийксого іконоклязму». Семінар выголосит выдатный патролоґ і візантинолоґ о. проф. Юзеф Наумович. В рамках стрічы одбуде ся презентация джереловых текстів візантийского іконоклязму печатаных о. проф. Наумовичом в сериі «Візантийска Бібліотека». Подіі буде товаришыла выстава пн. «Дві іконы Воплощыня», представляюча дві іконы авторства Юрия Новосільского з приватной колекциі – Ісус Пантократор і Одигітрия.