Піддукляньска бібліотека перешла модернізаційов

Одділіня про дорослых в Піддукляньскій бібліотеці у Свіднику перешло обновов. Підпорив тоту обнову зряджователь бібліотекы, котрым є Пряшівскый самосправный край (ПСК), а так само Фонд на підпору уменя. Інформовала о тім говоркыня ПСК Даша Єленьова.

Цілковы вытраты на модернізацію одділіня выросли на приблизно 76 тісяч евр, причім край проєкт підпорив сумов майже 29 тісяч евр. В рамках модернізації одділіня здобыло новы реґалы на книжкы, бо попередні уж мали і веце як 50 років, зробив ся новый централный пулт і підлогы. Одділіня має по обнові і нову компютерову техніку.

На першу етапу реконштруцкії просторів бібліотекы мала бы надвязати і друга, заміряна на модернізацію одділіня про діти. До другой етапы бы ся бібліотека хотіла пустити будь у 2023-ім, або найпізніше у 2024-ім році. Вытраты на модернізацію одділіня про діти одгадують на приблизно 60 тісяч евр, а бібліотека потребує здобыти на тото грошы через далшый проєкт.

Піддукляньска бібліотека у Свіднику была основана у 1953-ім році і як єдина на Словакії вдяка голандійско-словацькому проєкту у 1993-ім році зачала забезпечовати книжно-інформачны службы посередництвом мобілной бібліотекы, котра днесь обслугує 55 сел окресів Свідник і Стропків.

В тім році бы мала бібліотека здобыти новый, модернішый бібліобус, на котрый ПСК выділив 230 тісяч евр. У 2021-ім році мала 1786 реґістрованых чітателів, приготовила 175 подій і навщівило єй понад 26 тісяч людей. Цілково зреалізовала майже 70 тісяч пожычінь книжок.

11-го марца быв змодернізоване одділіня посмотрити і председа Пряшівского самосправного краю Мілан Маєрьскый. Як конштатовав на своїм офіціалнім сайті на сіті Facebook, бібліотека по модернізації вызерать „свіжо“.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА