Сумар дня на 16. марця 2022 р.

Приносиме вам сумар медияльной ґрупы ЛЕМ.фм+ на ден 16. марця 2022 р.

Комітет для біженців з Украіны

В малопольскым воєвідстві покликали Стеруючый Комітет дс. Системовой Координациі Підпоры Біженців з Украіны. Становит він елемент Малопольского Гуманітарного Щыту. Комітет, під ведіньом маршалка Вітольда Козловского, має дати можливости скорой і ефективной реакциі на актуальны проблемы звязаны зо збільшаючым ся чыслом втікаючых перед войном на обшыри воєвідства. До самого Кракова од початку войны приіхало найменше 100 тис. біженців. Вельох деклярує, што хоче одраз робити в Польщы, жебы в часі войны на Украіні заґарантувати собі утриманя. По войні вельох хоче вернути до свойой державы. Подля даных граничной стражы, од 24. лютого/фебруара границю з Польщом перекрочыло уж близко 2 млн біженців з Украіны.

Підкарпатскє воєвідство промує ся в Дубаю

Выставом робіт Здзіслава Бексіньского та дескальом представляючым Ігнатия Лукасєвича промує ся як раз підкарпатскє воєвідство на Expo 2020 в Дубаю. Самоуряд репрезентували віцемаршалок Пьотр Пільх, ведучый соймику Єжы Борч та радный Кжыштоф Ферет. В Дубаю офіцийні одкрыли експозицию підкарпатского воєвідства. Публика може видіти м.ін. повекшену репліку нафтовой лямпы конструкциі Ігнатия Лукасєвича, його рухомый портрет ци образы Бексіньского. Єдном з атракций єст дескаль саноцкого артисты Аркадиюша Андрейкова (автора м.ін. дескалів з лемківскыма темами, якы находят ся по Лемковині). Польскій павілон зродил заінтересуваня Мугамада ібн Рашіда Аль Мактума, арабского шейка, еміра Дубаю, премєра і віцепрезидента Зъєднаных Арабскых Еміратів. Підкарпатскє воєвідство промує ся тіж кухньом. Кошт орґанізациі участництва воєвідства на Expo 2020 в Дубаю то 2,2 млн зл. Грошы походят в Европейского Фонду Реґіонального Розвитку. Выстава Expo 2020 потырват до кінця марця.

Антисемітскы вандалі

Ліґницка поліция глядат злочынців, якы здевастували передпохоронный дім і мацевы на жыдівскым цмонтері при Вроцлавскій улици в Ліґници перед тыжньом. Розбили они шыбы в будинку, нич не вкрали, бо і з будинку не было што вынести. На стінах обєкту лишыли якісы символы. По парох днях вказало ся, што і мацевы на кіркуті сут понищены. До цмонтеря легко ся достати – злодіі вкрали огороджыня, метальовы стопкы тримаючы сітку і вшытко, што метальове, надаюче ся продати на злом. Анна Лазарек, ведуча Жыдівской Ґміны в Ліґници коментує, што жыдівска ґміна чыслит лем коло 30 спокійных осіб і што хоц тілько нещестя докола, то антисемітизм дале фунґує. Розслідуваня в обох справах веде ліґницка поліция.

Будуют предшколя в Репеди

4. марця з візитом в Репеди был міністер Міхал Цєсляк. Окрем него в місцевости был і Адам Дрозд, радный соймику підкарпатского воєвідства. Візита звязана была з офіцийным початком робіт при будові нового будинку предшколя в селі. Інвестицию реализує самоуряд ґміны при Основній Школі в Репеди. Міністер і радный соймику перше зазнаємили ся в ґмінным уряді з інвестицийныма плянами, пак делеґация перешла до школы, де директор єдиниці повюл гостів по школі і розповіл про поступ робіт. Обєкт є будуваный при участи середків в Урядового Фонду Локальных Інвестиций.