В Мадярьску будуть парламентны выборы. Русины будуть выберати говорцю

Мадярьскый презідент Янош Адер выписав 11-го януара 2022-го року парламентны выборы на 3-го апріля. Кампань перед выборами зачала 12-го фебруара.

Проти владного блоку Fidesz-KDNP під веджіньом сучасного премєра Віктора Орбана ся у выборах поставить опозічне зґрупованя шестьох політічных партій з назвов В єдности за Мадярьско (Egységben Magyarországért), якого кандідатом на премєра є Петер Маркі-Зай.

Мадярьскы парламентны выборы суть повязаны і з выбераньом представителів меншын. У змішаній сістемі выборів до Земского сейму мають меншыны право выбрати собі свого депутата або говорцю. Залежыть од того, кілько знають довєдна позберати голосів. Кандідатный список публіковало уж і Вседержавне русиньске самосправованя.

Меншыны в мадярьскім парламенті

Тринадцять народностных меншын має в Мадярьску в рамках парламентных выборів право выбрати собі і свого депутата. Но не є то таке просте, векшына меншын, включно Русинів, будуть знова мати лем говорцю.

Покля бы меншына хотіла мати депутата, кандідат бы мусив здобыти 20 – 25 тісяч голосів. Меншыны в Мадярьску много раз не мать ани тілько членів. Голосы при векшых меншынах дале розбивать і то, же 20 тісяч голосів мусить здобыти єден кандідат (список кандідатів). Покля меншына має веце списків, меджі котры ся розділять голосуючі, достаточну кількость голосів, жебы мати депутата, не подарить ся здобыти.

Не треба забывати ани на то, же чісло голосуючіх в меншыновых выборах овпливнює і факт, же покля ся хтось зареґіструє, же хоче голосовати на народностных выборах, уж не може голосовати в рамках цілодержавного партійного списку. Значіть, будь голосуєте за представителя меншыны в парламенті, або за політічны партії.

Тото вшытко овпливнює резултат, же меншыны, хоць мадярьска леґіслатіва рахує з депутатами, не мають наконець з причіны малого чісла голосів депутата, але здобудуть холем говорцю. Говорця в мадярьскім парламенті має веце прав, лем не може голосовати. Но автоматічно стане членом народностного парламентного комітету, де уж і голосує.

Русины з десятьома кандідатами

Русины в Мадярьску не мають подля списованя із 2011-го року ани достаток людей, жебы могли выбрати собі депутата, кедьже ся їх приголосило втогды штось менше як 3400. Значіть, знова будуть выберати собі говорцю, котрым у двох функчных періодах дотепрь (рр. 2014 – 2018 і 2018 – 2022) была Віра Ґіріц.

Ґіріц є родачка із Ужгорода, котра в Марярьску жыє од 1978-го року. Перед тым была довгы рокы і предсидательков Вседержавного русиньского самосправованя.

Список кандідатів до тогорочных выборів публіковало Вседежавне русиньске самосправованя 2-го марца, і має 10 кандідатів, што є о єдного веце, як штири токы тому. На першім місці є знова Віра Ґіріц, за ньов з другого місця кандідує Віктор Крамаренко, котрый є председом Вседержавного русиньского самосправованя. Пак слідують далшы кандідаты, меджі котрыма є (за порядком списку) Янош Косняньскый, Олґа Сілцер-Ліковіч, Янош Соноцькый, Ґабор Варґа, Петер Гладинець, Йожеф Мудра, Базіл Мігаль Теленко і Сілард Поповіч.

Жрідло фотоґрафії: hollandiaimagyarok.nl.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА