Сумар дня на 10. марця 2022 р.

Приносиме вам сумар медияльной ґрупы ЛЕМ.фм+ на ден 10. марця 2022 р.

Пряшівска выстава о Лемковиі і єй жытелях

Уж днес в Музею Русиньской Культуры в Пряшові мож видіти выставу посвянену Лемкам, Русинам – жытелям Лемковины. Вернісаж є о 16.00 год. Выстава находит ся в змодернізуваных просторах в Музею. Вказує она на жытя Русинів на Лемковині до часів ІІ світовой войны, але і траґічну дальшу долю, повязану з выселінями до Совітского Союзу, пак в рамах акциі «Вісла» в 1947 на понімецкы землі повоєнной Польщы. На выставі не бракне і елементів, якы засвідчают про пробы лемківского возроджыня перед 1989 р., а і дальшы діі Русинів уж в демократичній Польщы. Презентуваны будут цінны документы і фотоґрафіі представляючы важны подіі і особы з лемківского руху. Выстава буде доступна до кінця мая тр. Музичным гостьом вернісажу є Сусанна Яра. Треба дополнити, што то перша така выстава представляюча жытелів Лемковины серед жытелів Пряшівской Руси. То важный пункт в нашій спільній істориі.

Стріча редакторів і спілпрацівників радия ЛЕМ.фм

Як сме уж інформували, в минулу суботу прошло загальне засіданя Стоваришыня «Руска Бурса» в Ґорлицях. Но, в тот сам ден в бурсяных просторах одбыла ся тіж стріча редакторів і спілпрацівників першого лемківского радия ЛЕМ.фм, якє самособом діє при обществі. Част з редакторів то тіж члены Стоваришыня, зато стріча зачала ся по проведеным засіданю. Вчас радийовой стрічы вшыткы думками лучыли сме ся з нашыма редакторами і спілпрацівниками з Украіны, якы пережывают в тых часах тяжкы хвилі в звязку з войном зачатом Росийом. В проґрамі стрічы было предовшыткым вывчыня фукнций нового емісийного проґраму, якій збільшат технічны можливости нашого радия, а головно елімінує дефекты, з якыма стрічали сте ся вы – як слухачы – кєд нп. радийо часом перерывало. В тым місци за вшыткы Вашы дотеперішні анонсы дякуєме. Легше єст нам робити порядне радийо, коли даєте знати, што мож поправити.

Рутенія рекрутує

Фольклорный Ансамбль «Рутенія» з Братиславы оголосил рекрутацию. Колектив запрашат вшыткых, якы хотіли бы долучыти до того русиньского складу, якій пропаґує співочый і танцювальный фольклор не лем на Словациі, але і поза єй границями. Як пише ся в оголошыню публикуваным на фанпейджы ґрупы в сіти Facebook, як раз тепер Рутенія рыхтує ся до премєры нового проґраму і заєдно до святкуваня свойой річниці діяльности. Рекрутация зачне ся уж од 29. марця. Рутенія кличе музикантів, танцюристів і тых, што мают міцны голосы. Зголошыня мож посылати м.ін. пишучы на майль info@fsruthenia.sk.

ПСК змодернізує 50 мостів річні

Пряшівскiй Самосправный Край плянує модернізацию 50 мостів річні і за пят років досягнути такій стан, же на тій обшыри уж не будут планны мосты. Выголосил то председа ПСК Мілян Маєрскій. Поміч Крайови має быти зо страны Выділу Будівництва Жыліньского Університету. Його представникы підписали вчера в Уряді ПСК в Пряшові меморандум о спілпрацы. Як повіл Маєрскій, університет то добрый партнер при діаґностиці, технолоґічных поступах, модернізациі мостів ци верхніх частях дорожньой інфраструктуры. ПСК має 1236 мостів, з того Справа Доріг в Краю евідує два мосты в аварийным стані. Єден є через потік Ставенец за Руском Воловом в окресі Снина, другій через ріку Біла Вода за селом Лыса Поляна в окресі Попрад.