Із словацькой єпархії в Торонті став екзархат під русиньсков метрополійов

Як інформовав портал Vatican News, Папа римскый Франціск у четверь 3-го марца 2022-го року схвалив зміну Ґрекокатолицькой єпархії свв. Кіріла і Методія про Словаків у Канаді із центром в Торонті, на екзархат.

Юрідічно вже канадьска єпархія не буде належати під Ґрекокатолицьку метрополітну церьков на Словакії, але перешла під русиньску метрополію в Піттсбурзі в Споєных штатах Америкы.

Папа єдночасно выменовав за апостольского адміністратора sede vacante et ad nutum Sanctae Sedis (на порожній столець до одкликаня Святішым престолом) Екзархату свв. Кіріла і Методія владыку Курта Ріхарда Бурнетта, єпіскопа з Пассаік в США.

Бывша єпархія была зряджена у 1980-ім році Папом римскым Йоаном Павлом ІІ. Першым єпархом став владыка Михал Руснак, родак із земпліньского села Поздишовці. Од 2000-го року вів єпархію владыка Джон Пазак, наперед як єпарха, пак як апостольскый адміністратор sede vacante. У 2018-ім році выменовав Папа Франціск за нового єпарху далшого родака із Словакії владыку Маріяна Андрія Пацака, котрый ся функції хопив 15-го септембра. Єпіскоп Пацак зрік ся свого уряду в октобрі 2020-го року.

Якраз од того часу вів як апостольскый адміністратор єпархію владыка Курт Ріхард Бурнетте, єпіскоп із Пассаік, котрого єпархія належыть під русиньску Піттсбурзьку метрополітну церьков. Теріторія екзархату є згодна з теріторійов Канады. Моментално має штири парохії, пять священиків і нецілых 4000 віруючіх.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА