Выголошіня ОСРС односно сітуації на Україні

Приносиме вам Выголошіня Округлого стола Русинів Словеньска односно сітуації на Україні, котре прияла презідія 26-го фебруара 2022-го року.

„Дня 24-го фебруара 2022-го року Російска федерація напала на свого сусіда – Україну. Дану сітуацію слідуєме із жальом, діяня Російской ферерації не є лем діяньом проти Україні, але і проти демократічным і людьскым цінностям, на котрых є збудованый світ по Другій світовій войні. Не є жадных похыбностей о тім, хто напав на кого, і хто ся лем боронить.

На Україні маєме нашу найвекшу русиньску комуніту. Нашы русиньскы братя і сестры днесь терплять вєдно із вшыткыма жытелями Україны, котры ся боять о свої жывоты, жывоты своїх близкых, родічів, дітей. Хоць Русины доднесь не были Українов, як єдинов країнов, узнаны за окремый народ, не суть їм признаны їх народностны права, тым найважнішым про нас теперь є закончіти войну, вернути мір, жебы не вмерали невинны люди.

Округлый стіл Русинів Словеньска высловлює свою солідарность нашым русиньскым братам і сестрам на Україні. Свою солідарность єдночасно высловлюєме вшыткым жытелям Україны, цілій україньскій державі. Думками сьме з вами. Ваш біль прожываме з вами. Вашы слызы суть і нашыма слызами. Русины все были проти войні, проти аґресії. І теперь ясно одсуджуєме аґресію і сьме проти войні, котру зачала Російска федерація.

Просиме вшыткых, котры будьякым способом годны помочі людям з Україны, якы днесь прожывають найгіршы часы, жебы так зробили.

Гуманітарна поміч в подобі фінанчного дару на рахункы орґанізацій, котры уж про Україну выголосили збераня грошей на купліня потребного товару, якый ся уж зберать про утеченців або ся везе прямо на Україну, ці понука притулку про утеченців котры будуть приходити, є днесь тото найменше, што можеме зробити.

Памятайме на то, же война на Україні є огрожіньом міру і слободы нелем про Україну, але про цілый світ. Маєме надію, же собі то усвідомлюють і світовы лідры, і чімскоріше найдуть одповідны діпломатічны рішіня, жебы войну заставити. Желаме Україні і світу мір!“