Ексклузів, якый мы не заслужыли – субота 14.00 год.

В ефірі можете выслухати спеціалне выданя о сітуації на Україні під назвов Екслузів, якый мы не заслужыли. Одвысыламе розговор з родачков із Підкарпатя, в сучасности жытельков выходной Росії, пригранічной теріторії з Українов.

Єм Русинков, єм гражданков Україны. Моя родина жыє на різных сторонах войнового конфлікту: у Росії і на Україні. Тым самым є роздліена і в інформаційнім просторі, і бою ся признати, же в скорій будучности, кедь не завтра рано, то запричінить внутрішньо родинну ненависть.

Зато днесь неодкладуючі додзвонила-м ся до Росії, до тых на другій стороні барікады, абы ся дізнати, што і як они ся там мають. Про безпечность членів мойой родины не можу вказати конкретны мена і назвы.

Треба розуміти, же іде реґуларна война не просто проти Україны, а проти цілого демократічного світа. Атака на слободу і демокрацію!

Інтервю Каріны Муляр одвысыламе в суботу 26-го фебруара 2022-го року о 14.00 год. , повторіня в неділю 27-го фебруара о 01.00 год.