Креничане не годят ся на масове вытинаня дерев

Жытелі Крениці підписуют онляйнову петицию проти масовій вытинці дерев в місті. Подают, што курорт замінят ся в пустыню, а під сокыру ідут здоровы дерева.

Місцевый активіста Анджей Цястонь бесідує, што дерева вытинают в ріжных місцях Крениці, примірно на Парковій Горі, значыт там, де дерева повинны быти особливо хоронены. В писмі апелюют до радных курорту, жебы тоты зажадали од бургомайстра поясніня і зарекомендували контролю. «Як то єст можливе, жебы нараз соткы, як не тисячы дерев стали ся загорозом для жытелів» – чытаме в писмі.

Бетоноза?

Бургомайстер Пьотр Рыба пояснят, што кажде дерево презначене до вытинкы было досліджене експертом і мусит быти усунене з оглядів безпекы. «Достаєме інформациі од ріжных люди, што дерева сут вытинаны тіж в місцях, котры не становили загорозы» – подає Анджей Цястонь, котрый веде фанпейдж «Крениця Факту» в сіти Facebook.

Жытелі Крениці думают, што місто замінят ся в бетонову пустыню, а цілю вытинкы є дополнити буджет ґміны. Авторы писма подают, што треба провести авдит лісників, котры евентуальні потвердят конечніст вытинкы.

Інтернетову петицию на днес підписало близко 90 осіб, серед котрых находят ся не лем теперішні жытелі міста, але і тоты, якы ся гын выховали, а днес жыют в ріжных частях Польщы. В петициі звертают ся о інтервенцию.

«Просиме застопувати дальше вытинаня! Просиме выцофати ся з піднятого рішыня і зажадати од бургомайстра переданя інформациі про скалю дотеперішньой вытинкы і плянів в тій обшыри. Просиме допильнувати, жебы были радикальні ограничены» – чытаме во фраґменті апелю.

Необхідна вытинка

Бургомайстер Крениці ґарантує, што не єст то рабункова вытинка, а контролюване, необхідне вытинаня. «Маме позволіня на кажде притинаня і вытинаня дерев, як не од консерватора памятників, бо находят ся поза хороненым тереном, то позволіня старосты. В примірі дерев, што находят ся при дорозі, маме опінію Реґіональной Дирекциі Охороны Середовиска» – пояснят П. Руба.

Окрем вытинаня дерев в місті, вытинкы в лісах, затвердженой староством, на обшыри Крениці вытинают тіж дерева, якы порастают рільничы поля, жебы привенути такы ґрунты до рільничого презначыня. Вытинати скінчат в будучым тыжни, в звязку з тым, што од початку марця зачынат ся період розмножуваня.

Фот. Крениця Факту