Сумар дня на 21. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 21. лютого/фебруара 2022 р.

Варштаты в рамках проєкту пн. «Карпаты і молодіж – вєдно сме міцнійшы»

В просторах Культурно-освітнього Дружства Карпаты в Вербасі в Сербіі, в суботу – 12. лютого/фебруара, одбыли ся першы з пятьох плянуваных варштатів в рамках проєкту пн. «Карпаты і молодіж – вєдно сме міцнійшы». За аґентуром Рутенпрес, в варштатах брали участ діти вербаскых основных шкіл, котры приналежат до русиньской, мадярской і украіньской нацийональной меншыны, і мают факультативный предмет свій материньскій язык з елементами нацийональной культуры. За словами координатора і особы одповідальной за проєкт др. Деяна Загоряньского, котрый є і членом Нацийонального Совіту Русинів, цілю проєкту є, жебы через креативну роботу запрезентувати язык, звыкы і культуру каждой нацийональной меншыны. Інчом цілю єст, жебы діти познали специфіку другых меншын, едукували ся і брали єдны другых як рівноправных без огляду на нацийональну і реліґійну приналежніст. За словами Загоряньского, завдякы проєктови вкажут ся специфіка і розділы, вельокультуровіст, котра єст богатством в мультікультуральным середовиску, якым є і Вербас. Проєкт підпорило сербскє Міністерство про людскы права, права меншын і социяльный діалоґ.

«Гымны і пісні Православной Церкви, похоронны і за помершых»

Вчера, 20. лютого/фебруара, в каплици при Музею Ікон в Варшаві одбыл ся концерт церковной музикы в 11. річницю смерти Юрия Новосільского. «Гымны і пісні Православной Церкви, похоронны і за помершых» заспівал мужскій ансамбль церковной музикы Катапетасма, під дириґентуром Лукаша Гайдучені. Награня з концерту єст доступне на фейсбуковым сайті Музею Ікон в Варшаві. На Новосільского і його творчіст спомнули і в Тынци. В минулу пятницю, 18. лютого/фебруара, одбыл ся там семінар, якій мал приближыти сакральну творчіст артисты. Подія была орґанізувана Аббатством Бенедиктинів. А іщы до кінця марця тр. мож в Аббатстві в Тынци обзерати выставу пн. «Артиста-пророк: іконы Юрия Новосільского».

Вебінар з Русинком з ЗША – Анном Томбацці

В наступну суботу, 26. лютого/фебруара, одбуде ся вебінар з Русинком з ЗША Анном Томбацці. Як пишут орґанізаторы на фейсбуковій подіі Carpatho-Rusyns Dallas, молода Русинка з Америкы вказує великы здібности в обшырях такых як музика, кінна атлетика, балет і інжынєрия. На стрічы Томбацці оповіст м.ін о тым, што влинуло на розвиток єй карєры як інжынєркы ракєтового мотора і як єй карпаторусиньска дідовизна дала імульс до досягніня той ціли. Жебы взяти участ в вебінарі, треба ся перше зареґіструвати, хоснуючы мотузок, што ся находит на фейсбуковым сайті орґанізаторів.

Вандрівкы по Маґурскым Нацийональным Парку для школярів

Зимовы вакацийны занятя для школярів в Маґурскым Нацийональным Парку потырвают іщы лем до пятниці. Безплатны вандрівкы по Парку пройдут іщы 21., 23. і 25. лютого/фебруара. Працівникы просят до участи в тереновых едукацийных занятях школярів разом з опікунами. На кажду стічу зрыхтуваны сут інчы трасы прогулькы, з котрых кажда має быти цілком інчым досвідчыньом природы. Час тырваня занять то ок. 2 год. Дрібниці про кажду з прогульок сут публикуваны на вебсайті та фейсбуковым профіли Парку.