«Слово» – Неділя блудного сына – неділя, 9.00 год.

Ісус говорить образный приклад о двох братах. Молодшый не хоче уж жыти в домі отця, хоче слободу. Отець йому доволив, за куртый час одышов, але скоро прогайновав богатство, жыючі розпустно.

Прягнув по слободі, але мімо дому отця єй не нашов, лем бідованя і трапліня. Так вступує до себе і роздумує вернути ся назад. Є то образ чоловіка, котрый ся чує обмеджованый заповідями Господа, хоче слободу.

Бог нам дав тот дар слободной волі. Чоловік може рішати ся, яков дорогов жывота ся выбере. Діавол баламутить обіцянками, же там, мімо Бога, мімо заповідей буде щаслтливым. А хто тому увірить зазнать намісто слободы рабство. Тогды заблисне даяка іскерка на жывот з Богом, яка радость была з чістого сумліня. І ту є діяня Божого милосердя, тоту іскерку запалює до поломіня, прягнутя вернути ся назад.

Коли чоловік вырішыть змінити свій жывот, зложыти тягарь своїх гріхів, Бог на нього чекать, як чекав отець на свого сына. Не вытыкать, што ся стало з його богатством. Але наказує вернути перше облечіня – знак приналежности до Божой родины. Выкормлене теля, котре отець наказує зарізати – є образ небесной гостины жертвы Божого Сына в Евхарістії.

А так нам днешнє слово говорить о людьскій слободі, о рабстві в сітях діавола, але і о Божім милосердю, котре перевышать вшыткы людьскы гріхы. Оно є приготовлене одпустити і прияти грішника, як прияв тот отець свого сына назад.

Свята Церьков нам указує в днешнім слові на Боже позваня вернуити ся, кедь сьме одышли од Бога, глядаючі фалшыву слободу, бо правдива слобода і правдиве щастя є лем в жывоті з Богом. Слава Ісусу Хрісту!

В неділю, 20. фебруара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. фебруара о 12.00 год. і 21. фебруара о 2.00 год. за русиньскым часом.