«Голосы Русинів Підкарпатя» – середа, 18.10 год.

Гостьом днешнього нашого выданя буде русиньскый актівіста і блоґер з Підкарпатя Віталій Блыцко.

А побісідуєме о його актівній популарізації русиньской културы на різных інтернетовых платформах, головно на двох – Facebook і Instagram. Так само позвідаме ся нашого респондента о планах до будучности.

„Стараю ся свого держати, но в сучаному світови то майтяжко. Колись быв єден телевізор, но може у дакого іщі і радіо, а нині у каждого у руках є цілый світ – то телефон, тому і нам, Русинам, треба ся до того адаптовати. І свою діятельность я зато зачав якраз на інтернеті,“ бісідує о своїй пути актівіста.

Ключовы темы інтервю:

• Русинство в жывоті Віталія Блыцка і його родины
• Прорусиньскы інтернетовы проєкты Віталія Блыцка
• Тенденції подалшого розвитку русинства на Підкарпатю з погляду актівісты

Віталій Васильовіч Блыцко народив ся 28-го августа 1990-го року у селі Соймы, што на Міжгірщіні, Підкарпатя. Є старыш сыном, із сестров ся выховльовали мамков і старыма родічами.

В реліґії і културі выростав, мама працовничка културы і уменя при сельскім домі културы, а дідко дяк у православній церькви, і якраз він найміцніше впливав на розвиток свідомости юного Віталія, і привив му любов до свого (із слов В. Блыцка).

В роднім селі здобыв неповну середню освіту, а то девять клас. Наслідно закінчів шпеціалізовану середню школу по автомеханіці у Міжгірю. За професійов не робив, глядаючі ліпшого жывота примушеный ходити по світі на заробіткы.

Вже десять років як занимать ся пропаґаційов і популарізаційов русинства на просторах інтернету через „стары фотоґрафії, котры заморозили нашу културу в часі,“ описує блоґер. Свій проєкт назвав Карпаторусинська Нація, початкы котрого заложыв іщі в на тот час актуалній соціальній сіті ВКонтакте.

На днешній день проєкт Карпаторусинська Нація ся розшырив і є представленый на різных інтернетовых платформах, такых як Facebook, Instagram, Youtube і Одноклассники. Довоєдна го слідує бівше як 50 000 людей з цілого світа.

В сучасности Віталій Блыцко занимать ся розвитком нової ґрупы Айно-Йо. Музика по-нашому на сіті Facebook, цільом котрой є зобрати відеороботы автентічной і модерной музикы з Карпатьского реґіону.

Слухайте «Голосы Русинів Підкарпатя» в середу 16-го фебруара 2021 р. о 18.10 год., або повторіня в суботу 19-го фебруара 2021 р. о 11.00 год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА