В Мішколці обновили катедралный собор. Фінанчно помогла мадярьска влада

Ґрекокатолицькый катедралный собор Успенія Пресвятой Богородіці в Мішколці перешов обновліньом свого інтерьєру. Выновленый собор посвятили 23-го януара 2022-го року.

Як інформовав Войтєх Богач, вікарій про мадярьскых віруючіх Кошыцькой ґрекокатолицькой єпархії, найвидителнішім елементом обновленого інтерьєру є 72 ікон розписаных на стінах катедралы. Суть зроблены в поствізантійскім штілі. Розпис быв робленый подля канонічных правил восточного обрдяду.

Обновліня підпорила влада

Інтерьєр храму посвятили вшыткы трьоми єпіскопи Ґрекокатолицькой метрополітной церькви в Мадярьску – архієпіскоп гайдудороґскый і метрополіта Філіп Кочіш, ніредьгазькый єпарха Авел Сочка і Атаназ Орос, котрый є єпархом в Мішколці. Вєдно з нима служыв і емерітный єпіскоп владыка Сілард Керестеш.

Мадярьску владу, котра дала фінанції на обновліня храму, репрезентовав заступник премєра Жолт Шемєн. На торжестві брало участь і сім римокатолицькых єпіскопів на чолі з архієпіскопом Андрашом Верешом, председом мадярьской конференції єпіскопів. Участным быв і реформованый єпіскоп Даніел Пастор.

Вшыткых участных на початку привітав домашній єпарха Атаназ Орос, на службі проповідав архієпіскоп і метрополіта Атаназ Орос.

На кінцю Божеской літурґії приговорив ся і представитель влады Жолт Шемєн. Підкреслив, же влада вже підпорила обновліня веце як три тісяч храмів у Карпатьскій котловині, і выбудованя понад двасто новых храмів. Кедьже владыка Атаназ высловив подяку за то, же влада в Будапешті підпорила тоту реконштрукцію, Шемєн на то зареаґовав, же якраз наопак, влада має быти вдячна Церькви, признавать і оцінює їй роботу, котру робить про країну і вшыткых жытелів.

На тот проєкт дала мадярьска влада коло 610 тісяч евр. Окрім розпису ікон обновили ся і електроіншталації, світла, модернізовало ся озвучіня, запровадило ся грітя під підлогов.

Припоминаме, же мадярьска влада вже фінанчно підпорила наприклад і выбудованя Русиньского ґрекокатолицько центру в Дебрецині, коло котрого будує ся і деревяна церьков.

Єпархія в Мішколці

Церьков Успенія Пресвятой Богородіці в Мішколці є катедралным собором Мішколцьской ґрекокатолицькой єпархії. Будовати зачали єй у 1902-ім році, докінчіли єй в році 1912.

4-го юна 1924-го року Святый Престол основав на теріторії Мадярьска Апостольскый екзархат Мішколця, до котрого припало 22 парохій, якы перед тым належали до Мукачівской і Пряшівской єпархії. Тоты парохії знайшли ся на теріторії Мадярьска по Тріаноньскім договорі. Церьков в Мішколці тым стала катедралным собором.

На розділ од парохій Гайдудороґской єпархії, котра уж втогды хосновала в богослужінях мадярьскый язык, парохії екзархату в тім часі іщі служыли на церьковнославяньскім языку.

Екзархат у 2011-ім році на основі декрету Конґреґації про восточны церькви здобыв 29 парохій Гайдудороґской єпархії. 20-го марца 2015-го року быв екзархат перетвореный на єпархію, котра вошла до складу новоствореной Гайдудороґской метрополії, в котрой складі є іщі Гайдудороґска архієпархія і Ніредьгазька єпархія.

Фото: Норберт Задубеньскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА