Сумар дня на 11. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 11. лютого/фебруара 2022 р.

Рада Европы занепокоєна зменшыньом выміру вчыня німецкого як языка меншыны

Як сме недавно інформували, в пятницю, 4. лютого/фебруара, польскій Міністер Едукациі і Наукы Пшемыслав Чарнек підписал розпоряджыня, што зменшат вымір годин вчыня німецкого як меншынового языка з трьох годин тыжньово до лем єдной. Комісия експертів до справ записів Европейской карты реґіональных або меншыновых языків высловила в середу, 9. лютого/фебруара тр., занепокоіня редукцийом чысла годин вчыня німецкого языка для представників німецкой меншыны в Польщы, і попросила уряд в Варшаві пояснити справу. Представникы Рады Европы припомнули, што Польща, котра є членом конвенцниі о реґіональных і меншыновых языках, зобовязала ся хоронити тоты же языкы і підперати іх хоснуваня в приватным жытю і публичні. Комісия обвинят Польщу о занедбуваня німецкоязычной соспільности. Бернард Ґайда, шеф Союзу Німецкых Соспільно-Культурных Стоваришынь в Польщы оцінил, што новый перепис творит нацийональны меншыны двох катеґорий. За його словами, ждут правного скасуваня той зміны. Не уявляют сой, жебы в демократичній державі міг фунґувати такій принцип. Спілведучый Спільной Комісиі Уряду та Нацийональных і Етнічных Меншын Григорий Купрянович оцінил, же перепис одкрыто дискримінує громадян Польщы подля нацийональной критериі.

За вступи до нацийональных парків треба буде платити

Тырвают працы над проєктом закону, подля котрого за вступ до вшыткых 23 нацийональных парків, треба буде платити. Максимальна высокіст оплаты має быти рішена в розпоряджыню Міністра Середовиска. Што більше, до ціны білетів парків, котры ся находят в горах, дорахувана буде опата на GOPR або TOPR, в высокости 15% ціны білету. Додатковы оплаты будут за фотоґрафуваня і фільмуваня. Новы переписы реґулюют тіж брак оплат для осіб, якы жыют в ґмінах находячых ся в границях нацийонального парку, або сусідуючых. Проєкт закладат пару вынятків – з оплат за вступне будут звільнены прим. особы, якы ся будут хотіти достати до місц реліґійного культу на обшыри нацийонального парку, єднак будут ся мочы порушати лем по вызначеных путях. Проєкт реґулює і кары за брак білету або документу позваляючого на знижку. Додатково паркы не будут одповідальны за выпадкы, коли туриста зыйде з вызначеного шляку.

В окресі Снина побудут водоводы і канализацию

Забезпечыня воды до питя і канализациі про 28 сел в окресі Снина є подля Уряду Пряшівского Самосправного Краю о крок ближе ґу реализациі. Хоц в окресі Снина є великій водный резервуар Старина, з причыны якого скінчыло під водом сім русиньскых сел, і якій забезпечат воду до питя про велику част західньой Словациі, села в тым самым окресі не мают доднес інфраструктуры про водоводы і канализацию. Мало бы ся тото в будучности змінити. Депутаты Пряшівского Самосправного Краю на засіданю 7. лютого/фебруара тр. занимали ся і внеском о фінансову дотацию про забезпечыня основной інфраструктуры про села в сниньскым окресі. Кошт реализациі проєкту рахує ся на 1,56 млн евро, з чого 5% заплатит край. Водоводы і канализация мали бы быти одданы до диспозициі до кінця 2029 р.

Тереновы занятя в Маґурскым Нацийональным Парку

Маґурскій Нацийональный Парк просит на дальшу част зимовых вакаций. Од 14. лютого/фебруара зас будут орґанізуваны безплатны вандрівкы по Парку. Працівникы просят до участи в тереновых едукацийных занятях школярів разом з опікунами. Стрічы будут проходити в понедількы, середы і пятниці. Зрыхтуваных єст 6 прогульок на 6 інчых трасах, з котрых кажда має быти цілком інчым досвідчыньом природы. Час тырваня занять то ок. 2 год. Дрібниці про кажду з прогульок будут публикуваны на вебсайті та фейсбуковым профіли Парку все ден перед стрічом. Перша вандрівка уж в наступный понедільок о 10.00 годині.

Джерело мапы: https://zpppn.pl