Сумар дня на 10. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 10. лютого/фебруара 2022 р.

Русиньскій підручник

Як вчера поінформувал Ласло Буковскій, Уряд полномічного меншын на Словациі во спілпрацы з секретариятом Европейской карты реґіональных або меншыновых языків Рады Европы в Штрасбурґу приготовил материялы о языковых правах для жытелів Словациі, котры бесідуют по мадярскы, ромскы, русиньскы і украіньскы. Публикация вказує на можливости і інструменты, як хоронити і розвивати історичны реґіональны або меншыновы языкы. Буковскый вірит, што популяризаторскы материялы принесут жданы ефекты по страні хоснувателів мешныновых языків. Словация Карту підписала в 2001 р. (Польща о два рокы пізнійше, в 2003 р.). Карта має подля Конституций европейскых держав пріоритет перед державныма законами. На нашым інформацийным сайті єст мотузок, де можете найти русиньску версию публикациі.

Одновліня потягів медже реґіонами

Представникы містных самосправ хотіли бы посередництвом одновліня потягів на штреці першой угорско-ґалицийской желізниці підпорити розвиток туристикы в приграничным словацко-польско-украіньскым реґіоні. Меморандум о спілпрацы за словацку сторону кінцьом першого тыжня лютого/фебруара 2022 р. підписал пріматор міста Меджелабірці. Украіна посередництвом свого міністра зобовязала ся заінвестувати до свойой части штрекы і дати єй до кінця рока до ходу. Одновлена штрека буде на трасі од польского міста Устрикы Нижні через украіньску Смильницю, Хырів, Нижанковиці до Перемышля. Получыня зо Словацийом буде через Лупківскій Тунель до Меджелабірців. На стрічы представників приграничных самосправ мали доєднати ся, же буде оддана до хоснуваня ціла штрека од Меджелабірців до Львова. Вшытко стримує ся покля што з огляду на пандемію і неспокійну ситуацию медже Росийом а Украіном.

Вмер Ярослав Теплый

8. лютого/фебруара вмер Ярослав Теплый, музик, поета, і композитор мелодий лемківского походжыня, якій вродил ся і прожывал на Украіні. О передвчасній смерти Ярослава Теплого повідомил Жытомирскій Фаховый Коледж Культуры і Мистецтва ім. Івана Огієнка. Ярослав Теплый помер од коронавіруса на 61 році жытя. Перед парома роками было му признане званя Заслуженого Артисты Украіны. Вєдно зо свойом женом роками выступували в дуеті «Червене та Чорне». В своім репертуарі переспівували лемківскы пісні, творячы ґу тому мелодиі і відеокліпы. Артиста буде похороненый в Жытомирі. Вічна Памят!

Споможме выданя каталоґу выставы Мирослава Трохановского. Іщы лем три дни

Припоминаме, што того рока має быти зорґанізувана в ґорлицкій Ґалериі Двір Карвациянів выстава творчости Мирослава Трохановского. Має она мати наголовок «Місто нескінчене». На жаль, Ґалерия не єст в силі найти фінансів на выданя каталоґу, котрый мал бы промувати выставу. З той причыны на сайті www.zrzutka.pl Мирослав Трохановскій зорґанізувал тырваючу іщы лем 3 дни колекту на тоту ціль. Заохочаме спомочы творцю. Як пише Трохановскій, каждому, хто не зможе прити на выставу, постарат ся він переслати каталоґ. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит і карпатскы краєвиды і лемківскы церкви. Бракує іщы кус більше як тисяч злотых, жебы досягнути доцільову квоту колекты.