Рада Европы критикує Польщу. Іде о німецку меншыну

Рішыня, жебы ограничыти вчыня німецкого языка, непокоіт представників Рады Европы. Обвиняют они Польщу о занедбуваня німецкоязычной соспільности.

Комісия експертів до справ записів Европейской карты реґіональных або меншыновых языків высловила в середу, 9. лютого/фебруара тр., в Штрасбурґу занепокоіня редукцийом чысла годин вчыня німецкого языка для представників німецкой меншыны в Польщы. Комісия попросила уряд в Варшаві пояснити справу.

Представникы Рады Европы припомнули, што Польща, котра є членом конвенцниі о реґіональных і меншыновых языках, зобовязала ся хоронити тоты же языкы і підперати іх хоснуваня в приватным жытю і публичні. В опініі експертів моментально Польща не дотримує своіх зобовязань што до можливости вчыти по німецкы. Комісия обвинят польскы власти о тото, же штораз барже ослаблюют позицию німецкого языка в шкільній едукациі.

Привертаня рівновагы?

Минулого тыждня в Деннику Устав опубликували розпоряджыня, згідні з котрым од нового шкільного рока чысло годин вчыня німецкого языка для школярів, якы належат до німецкой меншыны в Польщы, є зменшене з трьох до єдной годины. Спосіб, в якій вызначено текст розпоряджыня, не лишат вантпливости, што є то діяня направлене конкретні на німецку меншыну.

Ініциятором змін єст походячый в Опольщыны посол Солідарной Польщы Януш Ковальскій, котрый переконує, што в тот спосіб привертана є симетрия в справі ситуациі Німців в Польщы і Поляків в Німцьох. Подля него польскы ученикы, якы ходят до німецкых шкіл, были дотепер дискримінуваны.

Одкрыта дискримінация

Бернард Ґайда, шеф Союзу Німецкых Соспільно-Культурных Стоваришынь в Польщы оцінил, што новый перепис творит нацийональны меншыны двох катеґорий. «Ждеме правного скасуваня той зміны. Не уявляме сой, жебы в демократичній державі міг фунґувати такій принцип» – бесідує Ґайда.

«То перепис, якій одкрыто дискримінує громадян Польщы подля нацийональной критериі» – бесідує Григорий Куприянович, спілведучый Спільной Комісиі Уряду та Нацийональных і Етнічных Меншын. «То безпрецеденсова ситуация. Буде означала ріжне трактуваня державом єй громадян, якы находят ся в тій самій ситуациі. Єдным словом, розпоряджыня закладат отверту дискримінацию. Шокує, што підписує тото правник-конституцийоналиста» – спостерігат Г. Куприянович.

Німці сут в Польщы офіцийні узнаном нацийональном меншыном. В часі повселюдного спису в 2011 році веце як 140 тис. осіб задеклярувало німецку нацийональніст. Рахує ся, што німецкоязычна меншына в Польщы є о вельо векша.