Премійов Дельвиґа оцінена і наукова робота о Александрови Павловічови

Доцент Факулты журналістікы Білоруськой державной універзіты Серґей Зеленко быв удостоєный Меджінароднов літературнов премійов імени Антона Дельвиґа „За вірность Слову і Отцюзнині“.

Высоке оцініня му было уділене за научно-бадательску роботу з назвов Образ Отцюзнины-Матери в гражданьскій ліріці Александра Павловіча. Робота была оцінена в катеґорії Наука і освіта.

Білоруськый ученый Серґей Зеленко штудовав творы єдного із найвекшых русиньскых будителів і выбрав у них три художны образы отцюзнины. „Каждый із них наповненый є глубокым смыслом і оддзеркалює історію русиньского народа і выходных Славянів,“ пише ся в інформації о оцініню білоруського доцента.

Універзіта єдночасно припоминать, же Александер Павловіч жыв у 19-ім столітю і быв Русином, „общественным діятельом і представительом народно-ослободжуючого руху“.

В конкурзі тот рік брало участь 52 авторів із Росії, Білоросії і Чорной Горы. Їх художны творы і науковы роботы были оціньованы в девятьох катеґоріях і штирьох шпеціалных катеґоріях. Тексты оціненых авторів-лавреатів будуть опублікованы в зборниках Настоящее прошлое – художественное слово и публицистика і Настоящее прошлое – наука и просвещение.

Оцінены авторы были торжественно нагороджены в Москві 29-го януара 2022-го року. Діпломы їм вручав головный редактор выданя Литературная газета Максим Замшев.

Меджінародна літературна премія імени Антона Дельвиґа „За вірность Слову і Отцюзнині“ была заснована у 2012-ім році. За їй заснованьом стоїть якраз Литературная газета. Барон Антон Дельвиґ, по котрім дістала назву, быв першым редактором той ґазеты і приятельом Александра Пушкина.

Головным цільом проєкту є професіоналне признаня і підтримка авторів, котры занимають ся найліпшыма традіціями класічной літературы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА