Сумар дня на 18. січня/януара 2022 р.

Приносиме вам сумар медияльной ґрупы ЛЕМ.фм+ на ден 18. січня/януара 2022 р.

В Нижніх Устриках рыхтуют цікавый туристичный проєкт

«Новый модель туристичного трансферу в Бєщадах» то думка Бартоша Ромовича, бургомайстра Нижніх Устрик. В рамках проєкту находит ся будова на обшыри ґміны специяльных паркінґів, де мож буде лишыти своє авто і дармо выпожычыти електричне авто. Єдночасно в специяльні запроєктуваным проґрамі, в «Креаторі подорожы» мож буде выбрати найбарже інтересуючы місця в Бєщадах, а альґоритм заплянує найкорыстнійшу подорож. В часі переізду до выбраного місця туристы будут мочы слухати прелекций і інтересуючых новинок од професийных провідників. Бургомайстер Ромович підкрислят, же проєкт єст інновацийный і може ввести дуже доброго. Окрем дбаня о чысте повітря через зменшыня емісиі шкідливых ґазів, дозволит ограничыти кошты подорожы, бо переізды для туристів будут дармо, а то піднесе туристичну атракцийніст реґіону. Додатково проєкт закладат, же електричны поізды будут засиляны завдякы енерґіі з одновлювальных джерел. Закля што бургомайстер глядат середків на реализацию проєкту.

Наступный крок в страну реализациі Аґломерацийной Желізниці Мідьового Басену

Нижньошлезска Служба Доріг і Желізниц оголосила конкурс оферт на опрацуваня передпроєктовой документациі Аґломерацийной Желізниці Мідьового Басену. Потенцяльны выконавці документациі мают час зложыти своі оферты до 27. січня/януара. Пак выграный выконавця до 2023 рока мусит представити проєкт. На основі тых документів інвестицию перейме і зреализує PKP Польскы Желізницьовы Леніі. Проєкт закладат возникніня желізницьовой леніі Любін-Польковиці-Ґлоґів, додатково ленія Рудна Ґвізданів-Любін-Ліґниця буде передолжена. Мапы представлены воєвідскым зарядом вказуют, же в Ліґници на одтинку Ліґниця-Злоторыя возникнут два новы пристанкы «Ліґниця Зосінек» і «Ліґниця Гута». Новый пристанок буде тіж на трасі Ліґниця-Явір. На тоту хвилю не знатя докладні, в котрым місци поміщены будут новы пристанкы. Фінансову участ в проєкті задеклярувало пят самоурядів – Любін, Польковиці, Ґлоґів, Ліґниця і ґміна Рудна.

Нацийональне Свято Русинів в Сербіі

Вчера в Сербскій Республиці Русины празднували Нацийональне Свято Русинів в Сербіі. Тота дата не єст припадкова і свято припадат на ден 17. січня/януара, на памят подіі з того же дня з 1751 рока, коли то адміністратор Бачкы, Франц Йозеф де Редль, підписал документ о заселіню обшыри Великого Керестура двостома русиньскыма родинами. О святкуваню той даты рішыл в 2007 році Нацийональный Совіт Русинів. Перше одзначыня того праздника одбыло ся в січни/януарі 2008 рока, а головным містом, де проходили празднуваня был Новый Сад. Тепер каждого рока центральне місто святкувань ся змінят. Того рока зас вернули до Нового Саду, де в неділю, 23. січня/януара, пройдут головны акциі звязаны з Нацийональным Святом Русинів. В його рамках орґанізуваны сут тіж ріжны стрічы і подіі в місцях, де мешкат особливо дуже Русинів.

«Кушнірство на Спишы» – нова выстава в Пєніньcкым Музею

Пєніньcкій Музей в Шляхтовій коло Щавниці, што єст єдным з одділів Музею в Новым Санчы, просит на выставу «Кушнірство на Спишы». Выставу зрыхтувал Любовняньскій Музей – Замок в Старій Любовни. Кушнірство было єдным з найпопулярнійшых фахів на Словациі, особливо в околицях Старой Любовні. Презентувана збірка складат ся з 39 елементів облечыня, в тым нп. кожухів, документує так здібности ремісників, як тіж іх естетичну вражливіст. Додатково на выставі нашло ся кушнірскє нарядя, што разом дає 96 експонатів. Выстава одкрыта буде од 4. лютого/фебруара тр.