Уряд влады рекомендує додаточны фінанції на аплікацію меншыновых языковых прав

Методічна інштрукція, котра має самосправам і державным урядам помочі фінанчно забезечіти і переглядніше робити розрахункы на аплікацію языковых прав меншын, рекомендує языкову компетенчну освіту робітників, але і Фонд на підпору аплікації языковых прав.

Інштрукція была в середу 12-го януара 2022-го року публікована на офіціалнім сайті Уряду уповномоченого влады Словацькой републікы про народностны меншыны.

Уповномоченый Ласло Буковскый про аґентуру TASR повів, же методічна інштрукція класіфікує окремы обовязкы зо закона про самосправы і штатну справу.

„Кедьже про орґаны верейной справы є мож дакотры задачі забезпечіти посередництвом їх робітників, котры знають меншыновый язык, або суть єдноразового характеру, наприклад при візуалній двоязычности, інштрукція рекомендує прияти до роботы односну кількость робітників, котры знають язык меншын і орґанізовати про них языкову компетенчну освіту,“ повів Буковскый.

„Єдночасно рекомендує і зрядити Фонд на підпору аплікації языковых прав, або забезпечіти механізм норматівной компензації высшых вытрат самосправ в повязаню з повніньом меншынового языкового закона,“ інформовав уповномоченый о матеріалі, котрый выникнув у сполупраці із самосправныма здружінями – Здружіньом міст і сел Словакії і Унійов міст Словакії.

Задача вытворити тот документ вышла із здобытых даных баданя, котры принесла Справа о стані вжываня языків народностных меншын на теріторії Словацькой републікы за період років 2019 – 2020.

Велика часть сел в баданю выразила, же фінанчны средства на забезпечіня аплікації закона о вжываню меншыновых языків не знать пораховати. Так само порівнательно великы села написали діаметрално іншы сумы на забезпечіня єднакых областей. Аналіза вказала, же многы села не додали релевантны даны, недостаточны дата вышли і з аналізы одповідей орґанів штатной справы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА