Сумар дня на 10. січня/януара 2022 р.

Приносиме вам сумар медияльной ґрупы ЛЕМ.фм+ на ден 10. січня/януара 2022 р.

Сенатскы комісиі приняли поправку до буджетового закону

Недавно інформували сме, же Польскій Сойм в проєкті буджетового закону на будучый рік взял до увагы поправку посланця Януша Ковальского, тыкаючу зменшыня о близко 40 млн злотых субвенциі направленой на вчыня меншыновых языків і вчыня реґіонального языка в школах. Посол Німецкой Меншыны Рышард Ґалля рішучо протестувал взглядом пропозициі посла Ковальского. Підкрислял, што права меншын сут частю прав чловека і прав громадянина. Одшмарити поправку апелювали тіж м.ін. меншынова сторона Спільной Комісиі Уряду та Нацийональных і Етнічных Меншын і академіцкє середовиско. Як поінформувал на своім фейсбуковым профіли Рышард Ґалля, Сенатска Комісия Наукы, Едукациі і Спорту приняна в середу, 5. січня/януара, поправку до буджетового закону на 2022 рік, котра приверне 39 млн 800 тис. злотых на освітову част загальной субвенциі для єдиниц територияльного самоуряду, з назначыньом на вчыня німецкого языка як языка нацийональной меншыны. За принятьом поправкы голосувало семох сенаторів, двох было проти, двох стримало ся од голосу. Сенатска Комісия Буджету приняла речену поправку пятьома голосами за і трьома проти. Поправка буде тепер голосувана на пленарным засіданю Сенату, плянуваным на тот тыжден.

Выремонтуваный міст на дорозі нр 1508 К

Одкрытый черговый міст в ґорлицкым повіті. Обєкт находит ся на повітовій дорозі нр 1508 К з Шымбарку через Быстру до Шальовой. Переправа была ремонтувана в рамках розбудовы повітовой дорогы 1507 К од липця/юлия минулого рока. Дорога была закрыта, обовязувал обізд державном дорогом 28, воєвідском дорогом 977, повітовом дорогом 1469 К Ґорлиці – Быстра – Лужна, та ґмінном дорогом в Быстрій. Не была поставлена лавка для пішых. Кошт цілой інвестициі то близко 2 млн 270 тис. злотых.

Пункт бадань AFS в Снітници

5. січня/януара в Снітници одкрыто інвестицию, яка має на ціли звекшыти біоасекурацийный потенциял обшыри адмініструваной Надлісництвом Лося. В рамках задачы был побудуваный найбарже модерный в реґіоні пункт, в котрым будут робити баданя на диках, ци хворіли африканьскым мором пацят (AFS). Інвестиция коштувала разом 164 тис. злотых і была фінансувана з середків лісового фонду. Актуально обшыр Надлісництва Лося, обнимаюча ґміны Устя Рускє, Ґорлиці та Ропа, находит ся в І зоні ASF. Нова інвестиция має реально влинути на захованя вымаганого санітарного режіму. Надлісництво припоминат, же держава, в котрій ствержено припадкы або огниска хвороты, тратит можлиціст експорту пацят, пацячого мяса і інчых продуктів. Барз тяжка єст тіж ліквідация найденых огниск хвороты.

Список вынятковых памяток в Гуменным

Жебы підпорити усвідомліня жытелів міста Гуменне о культурных і природничых памятках повязаных з його історійом і розвитком, самосправа вырішыла зробити евіденцию вынятковых памяток. Першых сім схвалили містны депутаты в минулым місяци. Найстаршом памятком на списку єст бароково-клясицистична грекокатолицка церков Успінія Пресвятой Богородиці. Подля історичных документів тот храм мал быти побудуваный на місци старшой деревяной церкви в 1767 р. Зато подля напису на таблици, яка ся находит на стіні церкви, была она побудувана уж в 1717 р. В списку першых семох памяток нашол ся і дім на Станичній улици з кінця ХІХ столітя, де урядувала інжынєрска дивізия Угорскых Кральовскых Желізниц. На список были вписаны і скульптура святого Йоана Непомука, Памятник Вдякы присвяченый Червеній Арміі, 150-річне дерево ґінко ци фольклорный колектив Калина.