Сумар дня на 30. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 30. грудня/децембра 2021 р.

Пращаме Штефана Телепа

Вчера, 29. грудня/децембра, вмер знаный лемківскій маляр, Штефан Телеп. Покійный жыл і творил на Лемковині. Його робота была часто порівнувана до творчости інчого выдатного непрофесийного маляря – Епіфана Дровняка (Никыфора Креницкого). Телепова творчіст была вельократно оцінена. Покійный вродил ся щестливо на рідній земли. Штефан Телеп пришол на світ в 1957 році. Простір верхів Лемковины оддзеркалял ся в його творчости. Од 1992 рока был членом Клюбу Штукы при Ґалериі Штукы Двір Карвациянів в Ґорлицях. Брал участ в шторічных артистичных переглядах Клюбу і малярскых пленерах. Своі образы презентувал на чысленных індивідуальных та ґруповых выставах м.ін. в Ґорлицях, Кракові, Варшаві, Ліґници, Креници, Вроцлаві і поза Польщом, головні на Словациі, напр. в Меджелабірцях, Пряшові, Свиднику і Бардийові. Його образы находят ся в вельох приватных колекциях на обшыри Польщы, Німец, ЗША, Канады, Австралиі ци в Музею Модерной Штукы Енді Варголя в Меджелабірцях. Покійный был одданый ждыньскій церкви. Деталі повязаны з похороном будут іщы подаваны до відомости. Вічна Памят!

З неба высокого

Днес, 30. грудня/децембра, в Ґорлицкым Центрі Культуры одбуде ся концерт промуючый платню під назвом «З неба высокого». На концерт просят довєдна ҐЦК та Камеральный Хор Belfersingers. Подія зачне ся о 19.00 год. в театальній сали. Вступне на подію дармо. Будеме мочы почути м.ін. лемківску піснярку Юлию Дошну, смычковый квартет Бескід, лемківскій ансамбль Серенча і хор Belfersingers під дириґентуром Якуба Звєжа. Подія одбыват ся в рамках проєкту «Музичны інспірациі – з традицийом в будучніст». Його ідейом єст выкорыстати богату музичну традицию Погірян і Лемків. В ціли гляданя пісен ци коляд схоснувано збіркы м.ін. Оскара Кольберґа. Вчас концерту будут звучати творы, якы так само нашли ся на платни. Не бракне серед них і лемківскых, в выконаню Юлиі Дошны і ґорлицкой ґрупы Серенча. Проєкт єст дофінансуваный з середків Европейской Уніі і Міста Ґорлиці.

Бурсяна велия 2021

Вчера в Рускій Бурсі в Ґорлицях традицийно проходила Велийна Стріча, яка зачала ся о 17.00 год. Перед ньом охочы варили велийны стравы і прикрашали яличку та поміщыня бурсы. На початку стрічы свій різдвяный концерт дал дітячый ансамбль Терочка, якій діє при Стоваришыню «Руска Бурса» в Ґорлицях. Присутны покоштували зрыхтуваны на тоту ціль традицийны лемківскы велийны стравы. Не бракло ани спільного колядуваня і складаня різдваных і новорічных желань. До стрічы о рік!

Іщы кус… і назбераме!

Припоминаме, што фурт тырват соспільна колекта на печатаня першой лемківской кухарской книжкы. В публикациі найде ся аж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej. Кампанія потырват до кінця грудня/децембра тр.