Ґорлицкій бурсак дoктор габілітуваный Павел Малецкій

Приємно нам заявити, што ґорлицкій бурсак і наш редакцийный камарат Павел Малецкій отримал наукове званя доктора габілітуваного. Заєндо отримал аванс од ректора, остаючы тым самым етатовым професором Науково-Технічного Університету (AGH) в Кракові.

Павел Малецкій званя доктора габілітуваного отримал за свій дотеперішній науковый доробок, якій был позитивно оціненый габілітацийном комісийом.

Дослідник інжынєрийно-технічных наук

Малецкій науковым званьом доктора габілітуваного был доціненый за своі науковы осягніня за цикль тематично повязаных науковых дописів в обшыри схоснуваня амбісоніі в інжынєриі звуку та досліджаня звукового краєвиду.

Кінцьом 2020 р. Рада Дисциплины Механічной Інжынєриі покликала габілітацийну комісию, якой задачом было розмостріти науковый доробок кандидата цілю признати му званя доктора габілітуваного. Комісия складала ся з професорів ріжных польскых університетів, в тым Науково-Технічного Університету в Кракові, Вроцлавской Політехнікы, Варшавской Політехнікы, Ґданьской Політехнікы і Західньопоморского Технолоґічного Університету в Щеціні.

Остаточно рецензенты позитивно заопініювали науковый доробок кандидата. Рішыньом з дня 29. жолтня/октобра 2021 р. Рада Дисциплины придала др. інж. Павлови Малецкому званя доктора габілітуваного в обшыри інжынєрийно-технічных наук, в дисциплині механічна інжынєрия.

Отриманя званя доктора габілітуваного в примірі Павла Малецкого вяже ся і з пізнійшым покликнаньом го через Alma Mater на етатового професора Науково-Технічного Університету (AGH) в Кракові, в ґрупі дослідничо-дидактичных працівників. Др габ. інж. Павел Малецкій єст одтепер професором надзвычайным єдного з найважнійшых технічных університетів в Польщы і Европі.

Павел Малецкій

Др габ. інж. Павел Малецкій завершыл студиі в двох напрямах: Автоматика і роботика та Механіка і будова машын зо специяльністю Інжынєрия звуку. На Механічным Выділі Науково-Технічного Університету в Кракові в 2013 р. оборонил докторску дисертацию на тему «Евалюация субєктивных і обєктивных прикмет акустичного простору, поміщынь о долгым часі поголосу». Його науковы заінтересуваня зосереджали ся на психоакустиці, а особливо на перцепциі хоровой музикы в присутности поголосу.

Актуально його заінтересуваня інтенсивно зосереджают ся на аурализациі та схоснуваню амбісонічных технік в анализі акустичных явиск. Занимат ся так само пересыланьом цифровых сиґналів, іх перцепцийом та оціном якости.

Єст автором понад 100 науковых прац, з чого 18 было друкуваных в часописах з листы Thomson Reuters, як тіж лавреатом вельох нагорід і стипендий, м.ін. Стипендиі Президента Міста Кракова ци европейского проєкту «Доктус». Як акустичный консультант є автором десяток проєктів, основал награньове студийо AGH «Котловня». Окрем чысленных науковых выступлінь на державных і заграничных конференциях, вюл варштаты з продукциі амбісонічного звуку на загальносвітовых звуковых симпозиях. Двократно был членом жырі вчас Student 3D Audio Production Competition in Ambisonics та в конкурсі Student Recording Competition the Immersive Audio Category at AES Convention.

Професор… технік першого лемківского радия

Павел Малецкій вродил ся 7. лютого/фебруара 1985 р. в Ґорлицях. По роді походит з Климківкы, Баниці і Вірхні (днес част Ґладышова). Своі дітячы і молоды рокы прожывал на Лемковині. Першы крокы на ниві лемківской культуры ставлял як член Репрезентацийного Ансамблю Лемків в Польщы «Лемковина». В пізнійшых роках вступил в шор членів одродженого Стоваришыня «Руска Бурса» в Ґорлицях.

Єдным з важнійшых етапів його діяльности в ґорлицкій Рускій Бурсі было основане в 2011 р. перше лемківскє радийо ЛЕМ.фм. Попри думкодавці радия, бл. п. Богдані Ґамбалі, Павел Малецкій был єдным з основателів проєкту і одраз стал редактором одповідальным за технічны справы. За вшыткы рокы радийовой роботы вюл такы авдициі як «Боіско», «З повагом – просит Павло Малецкій», ци сатиричны проґрамы з Богданом Ґамбальом як «Тыжден дозаду», «Тыжден допереду» ци «Ягнятка».

Был членом церковного хору «Ірмос» перемышльско-новосандецкой єпархіі ПАПЦ. В роках 2015-2018 был ведучым Стоваришыня «Руска Бурса» в Ґорлицях. Актуально є членом заряду того общества.

За вшыткы рокы свойой активности в Стоваришыню «Руска Бурса» в Ґорлицях Павел Малецкій своім професийным знаньом допоміг выдати пару лемківскых платен, зрыхтувати технічну обробку вельох радийовых авдиций ци провести технічны варштаты для редакторів ансамблю медияльной ґрупы ЛЕМ.фм+.