Сумар дня на 29. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 29. грудня/децембра 2021 р.

Буджет Малопольского Воєвідства на 2022 рік

В понедільок, 27. грудня/децембра, прошло XLVIII засіданя радных Соймику Малопольского Воєвідства. За принятьом буджету Малопольского Воєвідства заголосувало 25 радных, 10 было проти, 4 стримало ся од голосуваня. Як бесідувал маршалок Вітольд Козловскій, пандемія спричынила, што треба было зверифікувати пріоритеты в актуальній політиці воєвідства, што має оддзеркаліня в буджеті на 2022 рік. Буджет закладат, што доходы воєвідства вынесут 2 млд 124 млн зл, выдаткы – 2 млд 251 млн зл, а приходы – 182 млн зл. Беручы до увагы внескы зголошены вчас робіт над проєктом буджету, Заряд Малопольского Воєвідства звекшыл выдаткы на інвестицийны задачы реализуваны Зарядом Воєвідскых Доріг в Кракові, задачы в обшыри охороны здоровля і в обшыри підпоры культуры і нацийональной спадковины.

Підпора для русиньскых сел

Міністерство Інвестиций, Реґіонального Розвитку і Інформатизациі Словацкой Республикы выіднало з Міністерством Фінансів веце грошів для найменше розвинутых окресів на однову містных комунікаций, тротуарів і на розвиток туристичного руху. Сумом близко 17 мнл евро плянуют підпорити 150 сел з дванадцетьох окресів. На східній Словациі будут то села в русиньскых окресах Кежмарок, Сабинів, Собранці, Свидник, Требішів і Воронів над Топльом. Подля ресорту села передложыли множество проєктів, з котрых найвекшу част творили як раз активности повязаны з будуваньом і реконструкцийом комунікаций і ходників.

Обшыри обняты ріжныма рестрикциями повязаны з выступуваньом огниск АМП

Головный Дохтор Ветеринариі подал, што в звязку з унійным выконавчым розпоряджыньом, вызначены быил на териториі польской державы обшыри обняты ріжныма рестрикциями повязаны з выступуваньом огниск АМП – африканьского мору пацят. В тых обшырях обовязуют ограничыня в можливости переміщаня пацят, пацячого мяса і інчых продуктів походячых од пацят і диків. Ґорлицкій, ясельскій і новосандецкій повіты нашли ся в синій, першій обшыри на 3-ступіньовій скали. Ґміна Любін і част польковицкого повіту нашли ся в другій обшыри. Ґміна Пшемків, Шпротава і вельо інчых нашли ся в найвысшій червеній обшыри рестрикций. Дрібницьова мапа находит ся на офіцийным сайті Головного Інспекторату Ветеринариі. Того рока ствердили выступуваня уж 124. огниск АМП в Польщы.

«Дукляньскы» банкноты выпродали ся в два дни

Компанія Euro Souvenir Slovensko во співпрацы з селом Кружльова выдали сувеніровый банкнот. Хоц його вартіст то 0 евро, то вшыткы еґземплярі банкнотів выпродали ся протягом двох днів, што было великым заскочыньом. На зберательскых банкнотах нашло ся того рока выображыня танків з Долины Смерти. На 0-евровым банкноті выдрукуваный є Памятник Чехословацкого Армадного Корпусу і символика ТАРАН, што означат спосіб борбы, коли до себе наражают шыфы або інчы транспортны бойовы средства. Друга сторона сувеніровых грошів є така сама, яку мают вшыткы інчы того рода. Заінтересуваня «дукляньскыма» банкнотами было величезне – не хотіли іх купувати лем зберателі, але і люде зо села ци з піддукляньского реґіону. Продали 4000 банкнотів і 1000 додатковых з написом anniversary 2020.